Bakı. Trend:
Ukrayna Prezidenti Volodimir Zelenski bildirib ki, Ukrayna və ABŞ nümayəndə heyətləri bu həftənin sonunda sülh planının müddəaları üzərində işlərini davam etdirəcək və gələn həftə onun iştirakı ilə mühüm danışıqlar keçiriləcək.
Trend xəbər verir ki, Zelenski bu barədə teleqram kanalında yayımlanan videomüraciətində məlumat verib.
Dövlət başçısı bildirib: “Komandamız Amerika nümayəndələri ilə birlikdə həftənin sonunadək Cenevrə danışıqları nəticəsində əldə etdiyimiz razılaşmaları sülh və təhlükəsizlik təminatlarına yaxınlaşdıracaq şəkildə inkişaf etdirməyə davam edəcək. Nümayəndə heyətlərinin görüşü keçiriləcək. Ukrayna nümayəndə heyəti bu görüşə yaxşı hazırlaşacaq və əsaslı işə sadiq olacaq. Hazırda Amerika tərəfi və Avropadakı dostlarımızla əlaqə saxlayırıq.”
O əlavə edib: “Gələn həftə yalnız nümayəndə heyətlərimiz arasında deyil, həm də mənim iştirakımla vacib danışıqlar aparılacaq. Biz bu danışıqlar üçün möhkəm baza formalaşdırırıq.”