Azərbaycan, Bakı, 20 may / Trend , müxbir D.Xatınoğlu/ Əfqanıstanda ərəb ölkələrinin iqtisadi layihələrə sərmayə yatırması rəsmi Kabil üçün böyük əhəmiyyət kəsb edir. "Biz müxtəlif vasitələrlə ərəb ölkələrinin Əfqanıstanın abadlaşmasına, ölkədə iqtisadi layihələrə sərmayə yatırmasına ciddi səy göstəririk" - deyə, Əfqanıstan XİN-in mətbuat katibi Sultan Əhməd Bəhin Trend -a bildirib.
Əfqanıstan prezidenti Hamid Kərzai mayın 18-də Misirdə keçirliən Dünya İqtisadi Assosiasiyasının iclasında bildirib ki, rəsmi Kabil müsəlman ərəb ölkələrinin Əfqanıstanın abadlaşmasında daha yaxından iştirakını gözləyir. BBC-nin yaydığı məlumata əsasən, Avropa ölkələri ilə müqayisədə, ərəb ölkələrinin Əfqanıstanla iqtisadi əməkdaşlığının səviyyəsi qənaətbəxş deyil.
"Biz Misir konfransından əlavə, Parisdə keçiriləcək sammitdə də iştirak edəcəyik və ərəb ölkələrini Əfqanıstanda sərmayə yatırmağa cəlb etməyə səy göstərəcəyik" - deyə, Bəhin mayın 20-də telefonla Kabildən bildirib.
Onun dediklərinə əsasən, yalnız iqtisadi sahədə deyil, terrorizmlə mübarizə, mədəniyyət, kənd təsərrüfatı və hərbi sahələrdə də ərəblərin Əfqanıstanla əməkdaşlığı rəsmi Kabil üçün vacibdir. "Misir konfransında Kərzai bəzi ərəb Şuralarının, rəsmilərinin rəhbərləri ilə xüsusi danışıqlar aparıb. Biz son ildə bir çox ərəb ölkələrilə,xüsusilə də Səudiyyə Ərəbistanı və Misirlə ikitərəfli əməkdaşlığımızı müəyyən dərəcədə genişləndirmişik, lakin bu, qənaətbəxş deyil"-deyə, əfqan rəsmisi əlavə edib.
Bəhinin sözlərinə əsasən, digər ərəb ölkələrinin Əfqanıstanla əməkdaşlığında Misir və Səudiyyə Ərəbistanının vasitəçiliyi rəsmi Kabil üçün vacibdir. "Xüsusilə də, islam dünyasının ən güclü və nüfuzlu ölkəsi hesab olunan Səudiyyə Ərəbistanı ərəb xalqının əfqanlara mənfi münasibətini dəyişməkdə böyük rol oynaya bilər" - deyə, XİN-in mətbuat katibi bildirib.
Kərzai Misir konfransında BBC-yə verdiyi müsahibədə bildirib ki, ərəb xalqlarının Əfqanıstana mənfi baxışları var. Onun səzlərinə görə, Əfqanıstanın Taliban hakimiyyətindən sonrakı istiqaməti barədə ərəb xalqlarının məlumatı yetərincə deyil.
