Azərbaycan, Bakı, 1 oktyabr /Trend, müxbir A.Tağıyeva/
Türkiyədə 2014-cü ilin avqustunda keçirilməsi planlaşdırılan prezident seçkilərində ölkənin hazırkı Baş naziri Rəcəb Tayyib Ərdoğan qələbəyə əsas iddiaçı olaraq qalacaq. Bunu Trend-ə Türkiyənin daxili siyasəti üzrə ekspert, "Milat" qəzetinin redaktoru İsmayıl Yaşa bildirib.
"Özünün Baş nazirliyi dövründə Ərdoğan həm daxili, həm də xarici siyasətdə real uğurlara nail olub. О özünü uğurlu siyasətçi kimi göstərib, ona görə də onun Türkiyədə prezident seçkilərində qələbəsi ehtimalı böyükdür", - Yaşa deyib.
Onun sözlərinə görə, buna görə də seçkilərədək Ədalət və İnkişaf Partiyasının öz birliyini və ölkədə liderliyini qoruyub saxlaması vacibdir.
Yaşanın fikrincə, onu da unutmaq olmaz ki, Türkiyənin hazırkı Prezidenti Abdullah Gül növbəti dəfə ölkə prezidentliyinə namizədliyini irəli sürmək hüququna malikdir. Əgər Gül öz namizədliyini prezident postuna irəli sürərsə, o zaman Güllə Ərdoğan arasında kifayət qədər ciddi rəqabət müşahidə etmək mümkün olacaq.
"Lakin Türkiyədə bir çoxları hesab edir ki, Gül və Ərdoğan bununla bağlı razılığa gələ biləcəklər və Gül hər halda Rəcəb Tayyib Ərdoğana güzəştə gedərək prezidentliyə namizədliyini irəli sürməyəcək", - Yaşa deyib.
O, həmçinin Ərdoğana islam hərəkatlarının göstərdiyi dəstəyin vacibliyini də qeyd edib. Əgər seçkilərədək Ərdoğan Türkiyədəki islamçı liderlərlə yaxşı münasibətlərini qoruyub saxlaya bilsə, onda onun qələbə şansı artır. Çünki həmin hərəkatlar ölkə əhalisi arasında böyük nüfuza malikdirlər.
Bir az əvvəl İstanbulun meri Kadir Topbaş bəyan etmişdi ki, Baş nazir Rəcəb Tayyib Ərdoğan qarşıdakı seçkilərdə prezidentliyə namizədliyini irəli sürmək niyyətindədir.
Eləcə də bundan əvvəl Baş nazirin müavini Bəkir Bozdağ ölkədə prezident seçkilərinin 2014-cü ilin avqustuna təyin edildiyini elan etmişdi.
