Azərbaycan, Bakı, 21 yanvar /Trend/
Suriyanın xarici işlər naziri Vəlid Müəllim göyərtəsində Dəməşq nümayəndə heyətinin olduğu təyyarənin Afina hava limanında yubanması səbəbindən BMT-nin baş katibi Pan Gi Munla görüşü buraxmalı olub. Trend-in RİA Novosti-yə istinadən verdiyi məlumata əsasən, görüş "Ceneverə-2" beynəlxalq konfransı ərəfəsində İsveçrənin Montrö şəhərində yanvarın 21-nə təyin edilmişdi.
Məlumata görə, təyyarənin əlavə yanacaq doldurma ilə bağlı problemi olduğuna görə müvəqqəti olaraq Afina aeroportuna eniş edib. Təyyarə İsveçrəyə uçmamışdan öncə aeroportda 4 saat vaxt itirib.
Yunanıstanın rəsmi şəxsləri gecikməyə görə Suriya nümayəndə heyətindən üzr istəyiblər.
Qeyd edək ki, bəzi KİV-lər Yunanıstanın Suriya nümayəndə heyətinin təyyarəsinin Afinada yanacaq doldurmasına icazə verməməsi barədə xəbərlər yaymışdılar. Yunanıstan XİN bu məlumatı rəsmən təkzib edib.