Qafqaz Müsəlmanları İdarəsinin (QMİ) elm-təhsil şöbəsinin müdiri, Bakı İslam Universitetinin Sumqayıt şöbəsinin direktoru Hacı Mirəziz Seyidzadənin parlament seçkisində iştirak üçün namizədliyi qeydə alınmır. Trend in məlumatına görə, avqustun 26-da Beynəlxalq Mətbuat Mərkəzində mətbuat konfransı keçirən Mirəziz Seyidzadə bu barədə açıqlama verib.
O, bildirib ki, 71 saylı Masallı kənd seçki dairəsindən namizədliyini irəli sürməsi iyulun 21-də dairə seçki komissiyası (DSK) tərəfindən təsdiqlənib və imza toplaması üçün ona imza vərəqələrinin verilməsi barədə akt tərtib olunub. İyulun sonlarında 500 imzadan ibarət 10 imza vərəqəsini DSK-ya təqdim edərkən şifahi şəkildə ona bildiriblər ki, seçkidə iştirak edirsə, dini vəzifəsindən istefa verməlidir.
Hacı Mirəziz Seyidzadənin səlahiyyətli nümayəndəsi Niyaz Niftiyev mətbuat konfransında bildirib ki, Seçki Məcəlləsinin 10-cu fəsli, 53-cü maddəsinə görə namizədin seçkili dövlət orqanına seçkili vəzifəyə seçiləcəyi halda həmin vəzifə ilə uzlaşmayan fəaliyyətinə xitam verilməlidir. Yəni, din xadimləri də sənədlərini DSK-ya təqdim edərkən yazılı öhdəlik götürür ki, deputat seçiləcəyi təqdirdə dini fəaliyyətlə məşğul olmayacaq.
Namizədliyini irəli sürərkən bu barədə yazılı öhdəlik götürməsinə baxmayaraq, problem yaranmaması üçün Mirəziz Seyidzadə bütün dini vəzifələrindən istefa verib. Bu barədə tələb olunan digər sənədləri də DSK-ya verib, lakin buna da baxılmayıb və M.Seyidzadənin namizədliyinin qeydə alınmaması barədə qərar çıxarılıb.
Hacı Mirəziz Seyidzadə DSK-nın bu qərarını qeyri-qanuni hesab edir və yaradılan bu süni maneənin aradan qaldırılması üçün dövlət başçısı İlham Əliyevə, MSK sədri Məzahir Pənahova, o cümlədən, ABŞ-ın, Böyük Britaniyanın, Fransanın, Norveçin, Almaniyanın ölkəmizdəki səfirlərinə, ATƏT-in Bakı ofisinin rəhbərinə, Avropa Şurası baş katibinin Azərbaycandakı nümayəndəsinə müraciət edib.
