Azərbaycan, Bakı, 12 may / Trend , müxbir K.Zərbalıyeva /
Nərimanov rayon dindarları Dini İcmasının məhkəmənin qərarından verdiyi kassasiya şikayətinə mayın 27-də baxılacaq.
Dini İcmanın nümayəndəsi, vəkil Cavanşir Süleymanov bu barədə çərşənbə axşamı Trend -a məlumat verib və bildirib ki, Ali Məhkəməyə təqdim olunmuş kassasiya şikayətində Nərimanov rayon məhkəməsinin qətnaməsinin ləğvi və Əbu Bəkr məscidinin fəaliyyətinin bərpa olunmasına icazə verilməsi xahiş olunub.
Əbu Bəkr məscidində ötən il baş vermiş partlayışdan sonra məscid bağlanıb.
Trend -un arayışı: Ötən il avqust ayının 17-də saat 20:50 radələrində Bakı şəhəri, Ülvi Bünyadzadə küçəsində yerləşən Nərimanov rayon dindarlarının dini icmasının fəaliyyət göstərdiyi Əbu Bəkr məscidinə naməlum şəxs tərəfindən atılmış əl qumbarasının partlaması nəticəsində, iki nəfər hadisə yerində ölüb, 19 nəfərin sağlamlığına müxtəlif dərəcəli zərər yetirilib. Məlum hadisədən sonra məsçidin fəaliyyəti müvəqqəti dayandırılmışdı. Məsciddə terror aktının törədilməsində təqsiri olan Sumqayıt şəhər sakini Elnur Baxşıyev həbs olunub.
Bakının Nərimanov rayon məhkəməsi Nərimanov rayon dindarları Dini İcmasının iddiası əsasında ötən il oktyabrın 27-də məscidin fəaliyyətinin davam etdirilməsinə iacazə verilməsi barədə qətnamə qəbul etsə də, Nərimanov Rayon Polis İdarəsi qətnamənin ləğv olunması üçün məhkəməyə şikayət verib.
Appelyasiya şikayətində həmin ərazidə təhlükəsizliyin və ictimai asayişin qorunması üçün məcidin fəaliyyətinin bərpası barədə qərarın ləğv olunması xahiş olunur.
Məhkəmə Polis İdarəsinin şikayətini təmin edərək qətnamənin ləğvi barədə qərar çıxarıb.
Bu qərarla razılaşmayan İcmanın nümayəndələri Ali Məhkəməyə şikayət veriblər.
Məqalə müəllifi ilə əlaqə ünvanı: [email protected]