Azərbaycan, Bakı, 23 oktyabr / Trend , müxbir H.Bağıov/
Azərbaycanda "Quest net" firması adı altında dələduzluqla məşgul olmaqda ittiham olunan dəstə üzvlərinin məhkəməsi başlayıb.
Trend -un məlumatına görə, cümə günü Ağır Cinayətlərə Dair İşlər üzrə Məhkəmədə cinayət işi üzrə hazırlıq iclası keçirilib.
Dəstə üzvləri ayrı-ayrı vətəndaşları işə götürəcəkləri barədə yalan vədlər verməklə, əsasən gəncləri zərgərlik məmulatlarının satışına cəlb ediblər. Onlar on minlərlə vətəndaşa çəkisi üç qramadək olan qızıl məmulatlarını həqiqi dəyərindən on dəfə baha qiymətə, 800-1500 ABŞ dollarına sataraq külli miqdarda qazanc götürüblər.
Firmanın rəhbərləri mal almış hər bir şəxsin sonradan iki nəfərin, sonuncuların isə daha dörd nəfərin pulunu almaqla və bu işi həndəsi silsilə şəklində davam etdirməklə şəbəkə üzvlərinin artımına nail olublar. Eyni zamanda, fəallıq göstərəni "lider" adlandıraraq satış rəhbəri qismində müstəqil fəaliyyətə həvəsləndiriblər.
Araşdırmalar zamanı məlum olub ki, "Quest net" firmasının mərkəzi ofisi Çin Xalq Respublikasının Honq-Konq şəhərində yerləşir. Firmanın Azərbaycandakı agentliyinin rəhbəri Saatlı rayonunda anadan olmuş, 42 yaşlı Valeh Ağayevin təşkilatçılığı ilə cinayətin qurbanına çevrilmiş 20 mindən çox şəxsdən cəmi 5100 nəfərinə zərgərlik məmulatları verilib, daha 15 minə yaxın sadəlövh vətəndaş hədiyyə alacağı və işə düzələcəyi vədi ilə aldadılıb.
Mütəşəkkil cinayətkar dəstənin Binəqədi rayonunda yerləşən ofisinə baxış zamanı 859 ədəd müxtəlif zərgərlik məmulatı, hədiyyələr, kompüterlər, habelə hesabatlar və digər sənədlər aşkar edilərək götürülüb.
Davam etdirilən istintaq-əməliyyat tədbirləri ilə firmanın 23 satış mərkəzində işləyən 41 nəfər saxlanılıb, o cümlədən Valeh Ağayev və onun üç yaxın əlaltısı həbs edilib. Sonradan onlar barəsində həbs qətimkan tədbiri dəyişdirilərək zaminə buraxılıblar.
İş üzrə məhkəmə baxışının noyabrın 6-da keçirilməsi qərara alınıb.
Məqalə müəllifi ilə əlaqə ünvanı: [email protected]