Bakı. Trend:
Fövqəladə Hallar Nazirliyinin “112” qaynar telefon xəttinə Mingəçevir şəhəri ərazisində yol-nəqliyyat qəzası baş verməsi və vətəndaşların köməksiz vəziyyətdə qalması barədə məlumat daxil olub.
Trend xəbər verir ki, məlumat daxil olduqdan dərhal sonra FHN-in Dövlət Yanğından Mühafizə Xidmətinin yanğınsöndürən-xilasediciləri hadisə yerinə cəlb olunublar.
Əməliyyat şəraiti qiymətləndirildikdə məlum olub ki, "T-140" markalı traktor "QAZ-24" markalı minik avtomobilini yedəyə alaraq sərt yamacı qalxarkən hər iki nəqliyyat vasitəsi aşıb və içəridə olan vətəndaşlar köməksiz vəziyyətdə qalıblar.
Xilasedicilər traktordakı sürücü, 1993-cü il təvəllüdlü Mustafayev Firdovsi İlqar oğlunun meyitini, həmçinin traktorda olan və müxtəlif dərəcəli bədən xəsarətləri almış sərnişin, 1988-ci il təvəllüdlü Bəkirov Nicat Səfər oğlunu aidiyyəti üzrə təhvil veriblər.
Hadisə ilə bağlı müvafiq qurumlar tərəfindən araşdırma aparılır.