Azərbaycan, Bakı, 14 avqust / Trend , müxbir N.İsmayılova /
Beynəlxalq Maliyyə Korporasiyası (BMK) payızda Azərbaycanda Vergilər Nazirliyinin (VN) 2008-ci ilin yanvarından həyata keçirdiyi "vahid pəncərə" prinsipi üzrə yeni biznesin dövlət qeydiyyatı prosesinin araşdırmasını aparmağı planlaşdırır. Bu barədə cümə günü biznes mühitinin təkmilləşdirilməsi layihəsinin rəhbəri Boris Divyak deyib.
"Araşdırmalar sözügedən sistemin effektliyini nəzərdən keçirmək üçün 2008-ci ildən sistemin tətbiqinin başlamasından bəri olan dövrü əhatə edəcək, İqtisadi İnkişaf və Vergilər nazirliklərinin iştirakı ilə keçiriləcək", - Divyak deyib.
Onun sözlərinə görə, biznesin "vahid pəncərə" prinsipi ilə qeydiyyatına başlanandan bəri yeni müəssisələrin sayı 40 faizdən çox artıb. Sorğuda bu dövr ərzində qeydiyyatdan keçmiş kommersiya müəssisələrindən 650 yeni müəssisə iştirak edəcək.
"Araşdırmaların nəticələri əsasında təklif hazırlanacaq. Əminik ki, VN bu istiqamətdə islahatlar ağarmağa hazırdır", - layihə rəhbəri deyib.
VN bu sistemi daim təkmilləşdirir. Cari ilin iyulundan nazirlik yanında dövlət notarius xidmətləri göstərilir. Bu da sahibkarların qeydiyyatı prosesini daha da sadələşdirir. İndi Bakıda sahibkarların qeydiyyatı, eləcə də onların qeydə alınmış məlumatlarına dəyişikliklər edilməsi zamanı ərizələr və sənədlər yerindəcə notarial qaydada təsdiqlənə bilir.
VN-in məlumatına görə, "vahid pəncərə" sisteminin tətbiqinə başlanandan nazirlik 6070 hüquqi şəxsi ilkin dövlət qeydiyyatından keçirib, 14806 hüquqi şəxsin qeydiyyatı barədə məlumatlarda isə dəyişiklik edilib.
İlkin qeydiyyatdan keçən kommersiya hüquqi şəxslərdən 5692-si MMC, 18-i ASC, 21-i QSC, 54-ü korporativ, 285-i isə xarici hüquqi şəxslərin nümayəndəliyi və filialı formasında qeydə alınıb.
Ölkədə vergi ödəyicilərinin "vahid pəncərə" prinsipi ilə qeydə alınmasının tətbiqinə qədər 2007-ci ildə 3072 kommersiya hüquqi şəxs, 2008-ci ildə 982 ədəd çox 4054 kommersiya hüquqi şəxs qeydiyyatdan keçib.
Yeni sistemin yaradılmasından etibarən yeni müəssisələrin dövlət qeydiyyatı dövrü 20 dəfə azalaraq 3 günə enib. Verilən sənədlərin sayı da dəfələrlə azalıb. Prosedurun sayı 15-dən beşə enib. Əvvəllər 15 prosedurdan keçmək, 33 sənəd təqdim etmək tələb olunurdu və bu, 72 günə başa gəlirdi. Lakin "vahid pəncərə"nin tətbiqindən sonra ilkin qeydiyyat üç iş günü müddətində aparılır, mövcud qeydiyyat məlumatlarında düzəlişlər isə beş günə edilir.
Məqalə müəllifi ilə əlaqə ünvanı: [email protected]
