Azərbaycan, Bakı, 17 iyun /Trend, müxbir N.İsmayılova/
Yanvar-may aylarında Azərbaycanda adambaşına düşən gəlirlər 1056,7 manat (1315,3 dollar) təşkil edib ki, bu da ötən ilin müvafiq dövrünün göstəricisini 8,3 faiz üstələyir. Adambaşına real pul gəlirləri 6,2 faiz artımla 524,2 manat təşkil edib.
Hesabat dövründə orta hesabla adambaşına 211,3 manat (263 dollar) aylıq gəlir düşüb ki, bu da ötən ilin müvafiq dövrünün göstəricisindən 20,2 manat çoxdur.
Hesabat dövründə əhali şəxsi gəlirlərindən malların alınması və xidmətlərə 69,7 faiz, vergilərin, sosial sığorta haqlarının və icbari üzvlük haqlarının ödənilməsinə 9,9 faiz, gəlirlərin 9,4 milyard manatlıq ümumi həcmindən kapitalın toplanması və artırılmasına 18,7 faiz yönəldib.
Vergilərin və könüllü üzvlük haqlarının ödənilməsindən sonra əhalinin sərəncamında 8,5 milyard manat vəsait qalıb ki, bu da ötən ilin analoji dövr göstəricisindən 10,2 faiz çoxdur.
İyunun 17-nə olan cari məzənnə 0,8038 AZN/USD təşkil edir.
