Şərqi Avropa və Mərkəzi Asiyanın keçid iqtisadiyyatına malik ölkələrində məşğulluq imkanları tələb olunan səviyyədə deyil. Bu ölkələrdə məşğulluq imkanlarını yalnız müəssisələrin restrukturizasiyasının həyata keçirilməsi və investisiya iqliminin yaxşılaşdırılması yolu ilə stimullaşdırmaq mümkündür. Bu barədə Dünya Bankının "Şərqi Avropada və keçmiş Sovet İttifaqında Məşğulluq İmkanlarının Genişləndirilməsi" adlı yaydığı hesabatda bildirilir. Hesabatda kommunizmin süqutundan 15 il sonra keçid iqtisadiyyatına malik olan 27 ölkədə əmək bazarının təhlili verilir. "Əgər işsizlik sahəsində vəziyyət yaxşılaşmazsa, 1998-ci ildən sonra nail olunmuş yoxsulluğun azaldılması prosesi dayana bilər ki, bu da islahatlara siyasi dəstəyi zəiflədəcək" deyə hesabatda qeyd olunur. Hesabatda daha sonra deyilir ki, MDB ölkələrində məşğulluq problemi iş yerlərinin keyfiyyəti ilə daha çox bağlıdır : onlar az məhsuldardır və yüksək maaşlara imkan vermir. Hesabat şirkətləri sərmayə qoymağa və ölkələri investisiya iqlimini yaxşılaşdırmağa çağırır. 4000 müəssisə sahibi arasında keçirilmiş sorğunun əsasında müəlliflər şirkətlərin investisiya və işçi qəbulu barədə qərarlarına mənfi təsir göstərən amilləri təhlil etmişlər. İqtisadi və ya siyasi qeyri-müəyyənlik, korrupsiya, yüksək vergilər, qeyri-səmərəli məhkəmə sistemləri sahibkarlıq fəaliyyətini zəiflədən əsas amillər hesab olunur. Hesabatda aşağı gəlirli MDB ölkələrində (Qafqaz və Mərkəzi Asiya) vəziyyət inkişaf etmiş institutların və etibarlı infrastrukturun olmaması, qeyri-qənaətbəxş idarəetmə ilə xarakterizə olunur.
...