Azərbaycan, Bakı, 31 mart/ " müxbir A.Qasımova, D.Novosvitski/ABŞ prezidentinin NATO-nun sammiti ərəfəsində Kiyevə səfəri Ukraynanın Alyansa üzvlük məsələsinin gündəlikdə olmasını göstərdiyinə baxmayaraq, bu, yaxın vaxtlarda baş verə bilməz. "Buşun səfəri Ukraynanın NATO-ya üzv olması məsələsinin gündəlikdə dayandığını söyləməyə əsas verir. Hətta müzakirə edilməsə də, bu məsələ Buxarestdə "otaqda fil kimi" olacaq", - norveçli ekspert Asle Toje hesab edir (Asle Toje).
ABŞ prezidenti Corc Buş Ukraynaya martın 31-də başlayan dövlət səfərinin gedişində ukraynalı həmkarı Viktor Yuşşenko ilə Alyansın Buxarestdə keçiriləcək aprel sammitində Ukraynanın Üzvlük üzrə Fəaliyyət Planına (ÜFP) qoşulmasının perspektivlərini müzakirə edəcək.
"Bu gün Ukrayna NATO-ya daxil olmağa hazır deyil və Alyans da Kiyevə üzvlük təklif etməyə hazır deyil. Bundan əlavə, NATO-nun müdafiə nazirləri Ukrayna və Gürcüstanın üzvlük məsələsini qeyri-müəyyən tarixədək təxirə salıblar", - bazar ertəsi Norveçin Müdafiə Tədqiqatları İnstitutunun baş elmi əməkdaşı Toje elektron poçtla Trend -a bildirib. Ekspert bildirib ki, Corc Buşun Ukrayna, Rumıniya və Xorvatiyaya səfəri ABŞ-ın xarici siyasətində Avropanın əhəmiyyətini vurğulayıb və əlavə edib ki, belə səfər Vaşinqtonun NATO-nun gələcək genişlənməsinə tərəfdar olduğunu da vurğulayır. "Buşun Kiyevə səfərinin vacibliyinə həddindən artıq qiymət vermək lazım deyil. Əlbətt,ə prezident Buşun NATO sammitinə ərizə vermiş ölkədən başlaması əhəmiyyətlidir, lakin sırf rəmzi səviyyədə. NATO-ya üzvlük məsələsi yalnız Vaşinqtonda həll edilmir. Ukraynanın Alyansa daxil olması üçün bir çox maneələr aradan qaldırılmalıdır və bunun baş verəcəyi hələ müəyyən edilməyib", - Toje əlavə edib.
Ukraynalı ekspert Mixail Poqrebinski hesab edir ki, ABŞ prezidenti Corc Buşun səfəri zamanı Kiyev NATO-ya üzvlük üzrə Fəaliyyət Planına qoşulmaq haqqında yüz faiz zəmanət almayacaq, lakin növbəti dəfə Ukraynanın bu səylərinin Birləşmiş Ştatlar tərəfindən dəstəkləndiyini eşidəcək.
"Çox ehtimal ki, Buş deyəcək ki, NATO-ya qapılar açıqdır və ABŞ bu istiqamətdə Ukraynanı dəstəkləyir. Lakin son qərar Buxarestdə qəbul ediləcək. Beləliklə, Yuşşenkonun komandasının Plana qoşulmaq üçün zəmanət almaq ümidləri özünü doğrultmur", - Ukraynanın Siyasi Tədqiqatlar və Konfilktologiya Mərkəzinin direktoru Mixail Poqrebinski bazar ertəsi Trend -a bildirib.
Politoloqun rəyinə görə, faktorlardan biri də, Ukraynanın ÜFP-ə qoşulmasının əleyhinə çıxış edən Rusiyanın mövqeyidir. "Rusiya və Avropa Ukraynanın NATO-ya üzv olması məsələsində, bunun onların arasındakı münasibətlərə necə təsir edəcəyinə dair öz baxışlarından çıxış edərək, müvafiq qərar qəbul edəcəklər", - Poqrebinskiy bildirib.
Bu günədək Fransa və Almaniya Buxarest sammitində Ukraynanın ÜFP-ə qoşulmasının əleyhinə çıxış edib. Böyük Britaniya bu istiqamətdə Ukraynanı dəstəkləyir.
Beynəxalq münasibətlər üzrə alman ekspert Aleksandr Rar hesab edir ki, nə Ukrayna, nə də Gürcüstan Alyansa qəbul edilməyəcəklər. "NATO-ya üzv Almaniya, Fransa və İtaliya kimi ölkələr "soyuq müharibə" ritorikasına son qoymaq və strateji tərəfdaşlığı bərpa etmək üçün yeni imkanın olduğu vaxtda, Rusiya ilə küsüşmək istəməyəcəklər", - bazar ertəsi xarici siyasət üzrə Alman Şurasının Rusiya və MDB ölkələri Proqramlarının direktoru Aleksandr Rar elektron poçtla Trend -a bildirib.
Ekspertin rəyinə görə, Rusiyada hakmiyyətə liberal Medvedyev deyil, millətçi gələrdisə, Ukrayna və Gürcüstanın imkanları arta bilərdi. Aydın başa düşmək lazımdır ki, Qərb ölkələri üçün NATO-nun genişlənməsi sadəcə sevimli Şərqi avropalıları bayram stolu arxasında əyləşdirmək deyil. NATO ciddi hərbi təşkilatdır. Alyansın üzvlərindən birinin ünvanına hərbi təhlükə olduğu halda, onun üzvləri bir-biri ilə həmrəy çıxış etməyi öhdələrinə götürürlər", - ekspert bildirib.
Rar əmin deyil ki, Qərb ictimaiyyəti Abxaziyanın əldə edilməsi uğrunda Gürcüstanın tərəfində vuruşmağa razılaşardı və eyni zamanda, çətin ki, slavyan dövlətləri arasında lokal hərbi münaqişə yarandığı halda, Ukraynanın tərəfində vuruşar. Buş Ukraynaya NATO-nun qapılarının nə üçün onların üzünə açmadıqlarını anlamayan narıncı koalisiyaçıları sakitləşdirmək üçün Ukryanya gedir", - ekspert əlavə edib.
Müəlliflə əlaqə saxlamaq üçün elektron ünvan: [email protected]