Azərbaycan, Bakı, 03 fevral/ Trend , müxbir A.Hüseynbala/ Azərbaycanın bir neçə müxalifət partiyasının referendumla bağlı təsis etdiyi təşviqat qrupu digər müxalif qüvvələrin təsis etdiyi təşviqat qrupuna qoşulmayacaq.
"Biz müxalifətin təsis etdiyi bütün təşviqat qrupları ilə əməkdaşlığa hazırıq. Amma bizim təşviqat qrupu "Qarabağ və Respublika Uğrunda Hərəkat"a birləşmək niyyətində deyil", - çərşənbə axşamı Trend -a Demokratiya Uğrunda İttifaqda (DUİ) təmsil olunan Böyük Azərbaycan Partiyasının (BAP) sədri Elşad Musayev bildirib.
Trend -un arayışı: "Qarabağ və Respublika Uğrunda Hərəkat"-ın çərşənbə axşamı keçirilən toplantısına DUİ və AMİP qoşulmayıb.
Referendum üzrə 13 təşəbbüs qrupu imza vərəqələrini Mərkəzi Seçki Komissiyasına (MSK) təhvil verib.
Hakim Yeni Azərbaycan Partiyasının referendum üzrə "Yeni Azərbaycan", "Şəhər" və "Tərəqqi", "Hüquq və Demokratiya" təşəbbüs qrupları MSK-da qeydiyyata alınıblar.
Martın 18-də Azərbaycanda Konstitusiyanın 29-cu maddəsinə əlavə və dəyişikliklərin edilməsi məsələsi üzrə referendum keçiriləcək. Azərbaycan Konstitusiyası 1995-ci ildə qəbul edilib, 2002-ci ildə Əsas Qanuna əlavə və dəyişikliklər edilib.
Musayev deyib ki, DUİ-nin təsis etdiyi "Azərbaycan Xalq Cümhuriyyəti" təşviqat qrupuna "Qarabağ və Respublika Uğrunda Hərəkat"a qoşulmaqla bağlı rəsmi müraciət də edilməyib. "Belə bir müraciət olsa belə, bizim hansısa qrupun tərkibinə daxil olmaq niyyətimiz yoxdur. Biz yalnız bərabər şərtlər daxilində təşviqat qrupları ilə əməkdaşlığın tərəfdarıyıq", - BAP sədri əlavə edib.
Onun sözlərinə görə, "Qarabağ və Respublika Uğrunda Hərəkat"ın bu gün keçirilən iclasında iştirak etmək üçün də onlara rəsmi müraciət olunmayıb.
Dеmоkrаtiyа Uğrunda İttifаqı 2005-ci il parlamеnt seçkisindən sonra müxalifətçi Klassik Xalq Cəbhəsi, Azadlıq və Milli Demokratiya partiyaları yаrаdıb. 2008-ci il sеntyаbrın əvvəllərində Böyük Azərbаycаn, nоyаbr аyındа isə Хаlq pаrtiyаlаrı DUİ-yə üzv qəbul оlunub. İttifаq bu pаrtiyaların məşvərət və əməkdaşlıq qurumudur.
"Partiyamızın təsis etdiyi təşviqat qrupuna "Qarabağ və Respublika Uğrunda Hərəkat"a qoşulmaqla bağlı indiyədək heç bir rəsmi müraciət göndərilməyib. Biz bununla bağlı hərəkatın rəsmilərinin açıqlamalarını yalnız mətbuatdan oxumuşuq. İndiyədək partiyamızın rəhbərliyində təmsil olunan heç kəsə də belə müraciət edilməyib", - çərşənbə axşamı Trend -a Azərbaycan Milli İstiqlal Partiyasının (AMİP) informasiya və təbliğat katibi Əli Orucov bildirib.
Onun sözlərinə görə, əgər belə müraciət daxil olarsa, partiyanın kollegial orqanlarında müzakirə edib münasibət bildirmək olar. "Bizim təsis etdiyimiz "Milli İstiqlal" təşviqat qrupunun nümayəndəsi də "Qarabağ və Respublika Uğrunda Hərəkat"ın bu gün keçirilən iclasına rəsmən dəvət olunmayıb", - Orucov vurğulayıb.
АMİP 1992-ci ildə yaradılan və Azərbaycanda ilk dövlət qeydiyyatına alınan partiyadır. Etibar Məmmədov 2004-cü ilin sonunda partiyanın sədrliyindən istefa verdikdən sonra partiya daxilində parçalanma baş verib. Sonradan AMİP-in sədri olan Əli Əliyevə qarşı partiya daxilində narazılıq yarandığı zaman partiya üzvlərinin bir qismi AMİP-dən gediblər.
Məqalə müəllifi ilə əlaqə ünvanı: [email protected]
