Bakı. Trend:
Fransa hökuməti 1976-cı ildə süni və qeyri-qanuni referendumlar keçirdilər. Bununla da Mayot adasını işğal etdilər. 1995-ci ildən sonra bütün beynəlxalq təşkilatlarda Qəmər adaları ilə bağlı və Mayotun işğalı ilə bağlı, ümumiyyətlə, bütün məsələlər beynəlxalq müstəvidə Fransa hökumət tərəfindən bloklanıb.
Trend xəbər verir ki, bunu jurnalistlərə açıqlamasında Bakı Təşəbbüs Qrupunun rəhbəri Abbas Abbasov deyib.
O bildirib ki, Bakı Təşəbbüs Qrupu 19 ildən sonra bu mövzunu qaldıraraq, BMT-in qətnamələrini bir daha beynəlxalq ictimaiyyətin diqqətinə çatdıraraq, beynəlxalq konfrans keçirib.
"Bundan sonra da Bakı Təşəbbüs Qrupu BMT qətnamələrinin yerinə yetirilməsi üçün çağırışlar edəcək. Biz bu beynəlxalq hüquq müddəalarını hər zaman dəstəkləyəcəyik", - deyə o qeyd edib.
Qeyd edək ki, Bakıda Bakı Təşəbbüs Qrupunun təşkilatçılığı ilə Fransanın işğalı altında olan Mayot adasına həsr olunmuş beynəlxalq konfrans keçirilir.
"Qəmər Adaları İttifaqının Mayot adasının Fransa tərəfindən qeyri-qanuni işğalı" adlı konfransda Fransanın işğalına qarşı mübarizə aparan və Mayot adasının Qəmər Adaları İttifaqının (Komor Adaları İttifaqı - red.) tərkibinə geri qayıtmasına çalışan Qəmər Adaları İttifaqı, o cümlədən, Mayot adasının ictimai-siyasi xadimləri, elmi dairələrinin nümayəndələri, hüquq müdafiəçiləri, qeyri-hökumət təşkilatlarının rəhbərləri, siyasi partiyalarının üzvləri, habelə Azərbaycanda akkreditə olunmuş diplomatik korpusun nümayəndələri iştirak edir.
Konfransda Qəmər Adalarında Fransanın müstəmləkəçilik tarixi, Mayotun Fransa tərəfindən işğalı və bunun nəticəsində qəmərlilərə vurulmuş ziyan, Fransanın bu bölgədə müstəmləkəçilik siyasətinin geosiyasi və iqtisadi maraqları, habelə Qəmər Adaları İttifaqının Mayot adası ilə bağlı beynəlxalq təşkilatların mövqeyi müzakirə olunur.