Azərbaycan, Bakı, 14 avqust /Trend, müxbir E. Əliyev/
İqtisadi İnkişaf Nazirliyi (İİN) Azərbaycanın qarşıdakı 2014-2016-cı illərdə sosial-iqtisadi inkişaf göstəriciləri ilə bağlı proqnozlarına əsasən, 2013-cü ildə Azərbaycan iqtisadiyyatına 25 milyard dollar sərmayə yatırılacaq. Trend-in məlumatına görə, bu barədə çərşənbə günü Vergilər Nazirliyinin "Vergilər" qəzetində dərc olunan məqalədə bildirilir.
Nazirliyin İqtisadi siyasət, təhlil və proqnozlaşdırma şöbəsinin müdiri Ədalət Muradovun sözlərinə görə, ümumi sərmayələrin 72 faizi (və ya 18 milyard dollar) qeyri-neft sektoruna yatırılacaq.
Muradov bildirib: "2008-ci ildən bəri qeyri-neft sektorunda sərmayələrin artım tempi daha çox müşahidə olunub və 2012-ci ildə ən yüksək göstərici qeydə alınıb".
Muradov vurğulayıb ki, ötən il Azərbaycan iqtisadiyyatına 20 milyard dollar investisiya qoyulub ki, bunun da 15,7 milyard dolları qeyri-neft sektorunun payına düşür.
