Azərbaycan, Bakı, 19 aprel /Trend, müxbir N.İsmayılova/
Bakıda mayın 23-25-də Mərkəzi Asiya Regional İqtisadi Əməkdaşlıq Proqramının (CAREC) enerji sektoru üzrə Əlaqələndirmə Komitəsinin iclası keçiriləcək. Bu barədə Asiya İnkişaf Bankının (AİB) Bakı nümayəndəliyindən Trend-ə məlumat verilib.
Məlumata görə, iclasda Əfqanıstan, Pakistan, Özbəkistan, Monqolustan, Tacikistan, Türkmənistan, Çin, Qırğızıstan və Qazaxıstanın nümayəndə heyətləri iştirak edəcəklər.
İclas çərçivəsində CAREC-in X Nazirlər konfransına hazırlıq üzrə hesabat, Azərbaycanda energetikanın inkişafı sahəsində əməkdaşlıq, enerji sektorunda görülən işlər və iş planı haqqında hesabat üzrə məlumat, potensialın artırılması üzrə fəaliyyət, enerji sistemində planlaşdırma və istismar üzrə qərarların qəbulunun dəstəklənməsinə dair proqram təminatı müzakirə olunacaq.
CAREC - səkkiz iştirakçı ölkə (Əfqanıstan, Azərbaycan, Çin, Qazaxıstan, Qırğızıstan, Monqolustan, Tacikistan və Özbəkistan) və altı beynəlxalq təşkilatın (AİB, AYİB, Beynəlxalq Valyuta Fondu, İslam İnkişaf Bankı, BMT-nin İnkişaf Proqramı və Dünya Bankı) tərəfdaşlığından ibarətdir.
