Azərbaycan, Bakı, 20 fevral/Trend müxbir H. Vəliyev/
"Azerspace" peykinin idarə edilməsi üzrə əsas mərkəzin tikintisinin yeri müəyyənləşib. Bu barədə bazar ertəsi Trend-ə Azərbaycan Rabitə və İnformasiya Texnologiyaları Nazirliyindən məlumat verilib.
Mərkəzin layihəsi təsdiq edilib və tikinti şirkətinin seçilməsindən sonra tikinti üzrə işlər yaxın müddətdə başlayacaq. Peykin idarə edilməsinin əsas mərkəzi Bakı-Şamaxı yolunun 38-ci kilometrində yerləşəcək.
Naxçıvan Muxtar Respublikasının (NMR) ərazisində yerləşəcək ikinci ehtiyat mərkəzinin tikintisi üzrə bütün sənədlər də təsdiqlənib. NMR-də ehtiyat mərkəzinin tikintisi üçün bir hektar torpaq sahəsi ayrılıb.
Azərbaycanda peykin idarə edilməsi üzrə yerüstü stansiyaların tikintisi layihəsi bütün dünya standartlarına cavab verir. Peykin idarə edilməsinin əsas və ehtiyat mərkəzlərinin tikintisi üzrə işlər avqustda başa çatmalıdır.
Qeyd edək ki, yaxın müddətdə peykin sığortası ilə məşğul olacaq şirkətin müəyyənləşməsi də gözlənilir.
