Azərbaycan, Bakı, 3 noyabr /Trend, müxbir Hüseyn Vəliyev/
Əfqanıstan Azərbaycanın "Azerspace-1" peykinin köməyi ilə yayımlanan televiziya kanallarının sayını artırır. Bu barədə bazar ertəsi Trend-ə Azərbaycanın telekommunikasiya bazarındakı mənbə məlumat verib.
Agentliyin müsahibinin sözlərinə görə, yayım paketinə "1TV Afghanistan" kanalı daxil edilib. Hazırda Əfqanıstanın "Batur TV" telekanalı da sərbəst çıxışa malikdir. Mənbə bildirib ki, yaxın vaxtlarda "Azerspace-1" vasitəsilə yayımlanan əfqan telekanallarının sayı artacaq.
Peyk teleradio yayımı sahəsində əməkdaşlıq bir müddət əvvəl Azərbaycanın peyk operatoru ilə Əfqanıstanın "Afghan Paiwastoon Media and Communication" (APMC) şirkəti arsında imzalanmış müqavilə əsasında həyata keçirilir.
"Azerkosmos" ASC Qafqazda telekommunikasiya və rəqəmli yayım, eləcə də VSAT şəbəkəsinə xidmətlər göstərən yeganə peyk operatorudur.
Hazırda "Azerspace-1" peyki vasitəsilə yayımlanan televiziya və radio kanallarının sayı 120 ədəddir. Azərbaycan peyk yayımı sahəsində Türkiyə, Ukrayna, Gürcüstan, Rusiya və digər ölkələrlə əməkdaşlıq edir.
