Bakı. Trend:
Küveyt və Bəhreyn hakimiyyəti Dohadakı Əl-Udayd hərbi bazasına raket hücumundan sonra bağlanan hava məkanını açıb.
Trend xəbər verir, baza ABŞ Hərbi Hava Qüvvələrinin Fars körfəzindəki ən böyük bazalarından biridir və ABŞ-ın İranın nüvə infrastrukturuna zərbələrinə cavab olaraq hücuma məruz qalıb.
xxx
22:02
İraq, Küveyt və Bəhreyn İranın hücumlarına görə hava məkanını bağlayıb.
Trend xəbər verir ki, qərar İranın ABŞ-nin Dohadakı Əl-Udeyd hərbi bazasına raket zərbəsi endirməsindən sonra verilib. Baza ABŞ Hərbi Hava Qüvvələrinin Fars körfəzindəki ən böyük bazalarından biridir və ABŞ-ın İranın nüvə infrastrukturuna zərbələrinə cavab olaraq hücuma məruz qalıb.
Qeyd edək ki, İran ABŞ-nin Qətər və İraqdakı bazalarına raket zərbələri endirib.
İranın ABŞ hərbi bazalarına qarşı əməliyyatı “Qələbə müjdəsi” adlanır.
Bundan əvvəl İslam İnqilabı Keşikçiləri Korpusu (SEPAH) ABŞ-ın Qətərdəki bazasına hücumla bağlı bəyanat yayıb.
"Amerika Birləşmiş Ştatlarının cinayətkar rejiminin İran İslam Respublikasının dinc nüvə obyektlərinə qarşı açıq-aşkar hərbi təcavüzü və beynəlxalq hüququn kobud şəkildə pozulmasına cavab olaraq, Ali Milli Təhlükəsizlik Şurasının qərarı ilə və “Xatəmül-Ənbiya” Mərkəzi Komandanlıq Qərargahının rəhbərliyi altında İslam İnqilabı Keşikçiləri Korpusu (SEPAH) Qətərdəki Əl-Udeyd bazasına güclü raket zərbəsi endirib", - deyə bəyanatda bildirilib.
Qətərin Müdafiə Nazirliyi İranın Əl-Udeyd aviabazasını hədəf alan raket hücumunun uğurla dəf edildiyini bildirib.
"Allahın köməkliyi və hərbi qulluqçularımızın yüksək hazırlığı sayəsində hücum operativ şəkildə zərərsizləşdirilib. Hadisə nəticəsində itki və xəsarət alan olmayıb", - məlumatda deyilir.