Bakı. Samir Əli - Trend:
Lənkəranda axşam saaatlarından başlayaraq yağan güclü yağışın fəsadlar törətməməsi üçün tədbirlər görülür.
Bu barədə Trend-ə Lənkəran rayon İcra Hakimiyyəti başçısının müavini, rayon Fövqəladə Hallar Komissiyasının sədri Möhübbət Babayev məlumat verib.
Onun sözlərinə görə, şəhər ərazisində bəzi çökək ərazilərdə yerləşən həyətlərə su dolub:
"Hazırda həmin ərazilər sulardan təmizlənir. Ciddi fəsadlar yoxdur. Şəhər 2 saylı orta məktəbin həyətinə də su dolması barədə məlumat daxil olmuşdu. Dərhal həmin əraziyə briqada göndərildi və məlum oldu ki, məktəbin həyətində subasma olmayıb. Yağış güclü yağdığı üçün bir-iki çökək ərazidəki həyətlərdə qismən su yığılması olub və aradan qaldırılıb. Şəhər ərazisində kanalizasiya sistemləri təmizlənib və yağış sularının qarşısının alınması üçün tədbirlər görülür".