Azərbaycan, Bakı, 26 aprel / Trend , müxbir K.Zərbalıyeva/ !995-ci ilin mart hadisələrində iştirak etdiyi üçün beynəlxalq axtarışda olan Azərbaycan vətəndaşı həbs olunub.
DİN-in Xüsusi Təyinatlı Polis Dəstəsi (OMON) 1995-ci il martın 13-də dövlət çevrilişinə silahlı cəhd göstərib.
Bundan sonra hökumət qüvvələri ilə OMON arasında silahlı qarşıdurma yaranıb. Martın 17-də qiyamın qarşısı alınıb və OMON-un komandiri və daxili işlər nazirinin müavini Rövşən Cavadov həlak olub.
OMON-un üzvlərinin əksəriyyəti hadisədən sonra həbs olunub və bir qrup üzvü isə xarici ölkələrə qaçıb.
DİN-in Baş Cinayət-Axtarış İdarəsi əməkdaşlarının keçirdikləri əməliyyat-axtarış tədbirləri nəticəsində 2000-ci ilədək qüvvədə olmuş Cinayət Məcəlləsinin qanunvericilikdə nəzərdə tutulmayan silahlı birləşmələrin və ya qrupların yaradılması (70-2) və müvafiq icazə olmadan soyuq silah gəzdirmə, hazırlama və ya satma (220-2-ci) maddələri ilə barəsində dövlətlərarası axtarış elan edilmiş Mənsur Quliyev Rusiya Federasiyasının Nijni Novqorod vilayətinin Kstovo şəhərində tutulub.
Quliyev həbs olunandan sonra Azərbaycana gətirilib.
Məqalənin müəllifi ilə [email protected] ünvanı ilə əlaqə saxlaya bilərsiniz