Azərbaycan, Bakı, 30 iyul / Trend , müxbir C.Babayeva /
Azərbaycanın müxalifət partiyaları Dağlıq Qarabağ münaqişəsi ilə bağlı birgə kütləvi aksiyalar ideyasına fərqli yanaşırlar.
"Danışıqlara təşəbbüs göstərən tərəfin təklifindən imtina etmək düzgün deyil. Təklif daxil olandan sonra təşəbbüskar tərəfin niyyətləri açıqlanar. Ondan sonra konkret münasibət bildirmək mümkündür", - cümə axşamı Trend -a "Azadlıq" blokunda təmsil olunan Vətəndaş və İnkişaf Partiyasının sədri Əli Əliyev bildirib.
Trend -un arayışı: Demokratiya Uğrunda İttifaqda (DUİ) təmsil olunan partiyalar Dağlıq Qarabağ münaqişəsinin Madrid prinsipləri əsasında həllinə etiraz olaraq birgə kütləvi aksiyalar keçirmək təşəbbüsü ilə çıxış edib. Kütləvi aksiyalarla bağlı ictimai-siyasi təşkilatlar və ziyalılarla danığıqlar aparılması məqsədilə İşçi Qrup yaradılıb. Aksiyaların nə vaxt keçiriləcəyi məsələsi danışıqlardan sonra məlum olacaq.
DUİ 2005-ci il parlament seçkisindən sonra yaradılıb. İttifaqda Klassik Xalq Cəbhəsi, Azadlıq, Milli Demokrat, Böyük Azərbaycan və Xalq partiyaları təmsil olunur.
Azərbaycan Demokrat Partiyası (ADP) Dağlıq Qarabağ münaqişəsinin Madrid prinsipləri əsasında həllinə etiraz olaraq kütləvi aksiyaların keçirilməsini mənasız hesab edir.
"Dağlıq Qarabağ münaqişəsi kimi həssas problemə müəyyən kobud üsullarla müdaxilə problemin ağırlaşmasına gətirib çıxara bilər. Madrid prinsipləri milli maraqlara cavab verməsə, Azərbaycan hökuməti buna razılaşmayacaq. Yeniləşdirilmiş prinsiplər hələ açıqlanmayıb. Yeni prinsiplərin Azərbaycanın milli maraqlarına cavab verib, verməyəcəyi hələ bilinmir", - cümə axşamı Trend -a ADP sədri Sərdar Cəlaloğlu bildirib.
Cəlaloğlunun sözlərinə görə, hökumətə münaqişənin həllində güzəştlərə gedilməsi ilə bağlı təzyiq edilsə, o zaman iqtidarlı-müxalifətli birgə mitinq keçirilməsinə zərurət yarana bilər. "Həmin aksiya ilə bütün dünyaya Dağlıq Qarabağ münaişəsinin həlli ilə bağlı Azərbaycan cəmiyyətində yekdil mövqenin olduğunu göstərmək olar. Müxalifətin 300-500 nəfərlik kütləvi aksiya keçirməsi ciddi nəticə verməyəcək. Dağlıq Qarabağ məsələsində siyasi konyukturanın qəti əleyhinəyəm", - ADP sədri deyib.
Trend -un arayışı: İki Cənubi Qafqaz ölkəsi arasında münaqişə 1988-ci ildə Еrmənistanın Azərbaycana qarşı ərazi iddiası irəli sürməsi zəminində yaranıb. 1991-ci ilin dekabrında, Şuşa və Xocalı istisna olmaqla, Dağlıq Qarabağ Azərbaycanın nəzarətindən çıxıb. 1992-1993-cü illərdə Şuşa, Xocalı və Dağlıq Qarabağa bitişik yeddi rayon işğal olunub. 1994-cü ilin mayında tərəflər atəşkəs rеjiminə dair razılaşma əldə еdiblər və о vaхtdan bəri, ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə, hələ də nəticəsiz sülh danışıqları aparılır.
Məqalə müəllifi ilə əlaqə ünvanı: [email protected]
