...

Bahar Muradova: Xocalı soyqırımını törədənlər gec-tez ədalət məhkəməsi qarşısında dayanacaqlar

Siyasət Materials 17 Fevral 2016 15:44 (UTC +04:00)
“İnsanlığın bir qismi Xocalı soyqırımını günün hadisəsi kimi qəbul edir, bir qismi bunun yolverilməz olduğunu deyir, bir qismi isə görməzlikdən gəlirdi. Ən ağrılı tərəfini təbii ki, Azərbaycan xalqı yaşadı”.
Bahar Muradova: Xocalı soyqırımını törədənlər gec-tez ədalət məhkəməsi qarşısında dayanacaqlar

Bakı. Elçin Mehdiyev - Trend:

"İnsanlığın bir qismi Xocalı soyqırımını günün hadisəsi kimi qəbul edir, bir qismi bunun yolverilməz olduğunu deyir, bir qismi isə görməzlikdən gəlirdi. Ən ağrılı tərəfini təbii ki, Azərbaycan xalqı yaşadı".

Trend-in məlumatına görə, bunu Milli Məclisin vitse-spikeri Bahar Muradova parlamentdə keçirilən "Xocalı soyqırımı beynəlxalq hüquq müstəvisində" adlı tədbirdə deyib.

B.Buradova bildirib ki, Azərbaycan müstəqil dövlət kimi bu müddət ərzində bütün dünyaya öz sözünü layiqincə çatdıra bildi: "Ona görə də özünə qarşı belə cinayəti qəbul etmədi və bundan sonra da etməyəcək. Çünki bu, nə insanlığa, nə bəşəriyyətə, nə də humanist adət-ənənələrə sığır. Keçən müddət ərzində həm hökumət, həm parlament, həm də vətəndaş cəmiyyəti səviyyəsində Azərbaycan dövləti Xocalı soyqırımı, eləcə də Dağlıq Qarabağ probleminin dünya ictimiaiyyətinə çatdırılması istiqamətində hərtərəfli fəaliyyət göstərməyə çalışıb".

Vitse-spiker bildirib ki, hər il Xocalı soyqırımı ərəfəsində keçirilən tədbirlər daha da intensivləşir: "Bir çoxları cinayətkarların ədalət məhkəməsi qarşısında dayanmasını tələb edir. Gec-tez bunun baş verəcəyinə inanırıq. Ona görə də bütün lazımi addımları atırıq. Azərbaycanın həyatının bütün istiqamətlərinə obyektiv və dövlətçilik mövqeyinə münasibət yalnız ümummilli lider Heydər Əliyevin hakimiyyətə gəlməsindən sonra baş verib. O dövrdə ilk dəfə olaraq beynəlxalq qurumlara məhz Xocalı soyqırımı ilə bağlı məktubla müraciət edilmişdi".

B.Muradova deyib ki, 1994-cü ildə bu faciə soyqırım adlandırıldı: "Qəbul edilən müvafiq sənədlərdən sonra bu məsələnin heç də ayrılıqda baş verən hadisə olmadığını, Azərbaycana qarşı erməni millətçilərinin dəyirmanına su tökən beynəlxalq dairələrin məqsədyönlü, ardıcıl, müəyyən hədəflərə söykənən fəaliyyəti olduğunu, Xocalının da məhz bu fəaliyyətin ən dəhşətli nəticələrindən biri olduğunu qəbul etdirdik. Bu ardıcıl siyasət indi də İlham Əliyev tərəfindən davam etdirilir. Azərbaycanın artan nüfuzu imkan verdi ki, bu məsələlər daha geniş miqyasda dünyanın bütün qitələrini əhatə etsin. Bu gün heç kəs inkar edə bilməz ki, Xocalı soyqırımı baş verməyib. Xocalı soyqırımı beynəlxalq hüquq müstəvisində indiyə kimi araşdırılmağa səy göstərilsə də, buna hüquqi baxışlar hələ də bizim istədiyimiz səviyyədə deyil".

Məqalədə:
Xəbər lenti

Xəbər lenti