Azərbaycan, Bakı, 12 avqust /Trend, müxbir İ.Xəlilova/
Azərbaycan Mərkəzi Bankı yanında Mərkəzləşdirilmiş Kredit Reyestri Xidməti (MKR) cari ilin sentyabrında kredit alıcıları və qeyri-bank kredit təşkilatları (QBKT) üçün zamin öhdəlikləri haqqında hesabatın aparılmasının yeni növünün istismara verilməsi üzrə texniki işləri başa çatdırmağı planlaşdırıb. Bu barədə cümə axşamı xidmətin rəhbəri Elçin Həbibov deyib.
"Hesabatların aparılması üzrə yeni növün tətbiqi Mərkəzləşdirilmiş Kredit Reyestri Xidmətinin qaydalarına dəyişiklik edildikdən sonra mümkün olacaq ki, bu da razılaşdırılmaq üçün ölkənin Ədliyyə Nazirliyinə təqdim edilib", - Həbibov qeyd edib.
Qeyri-bank kredit təşkilatlarının kredit reyestrinə daxil olması "Qeyri-bank kredit təşkilatları haqqında" qanun qüvvəyə mindikdən sonra mümkün olub. Bundan sonra MKR hesabatların aparılması üzrə yeni növün tətbiq edilməsi üçün işləri fəallaşdırdı. Bunun üçün qeyri-bank kredit təşkilatları texniki cəhətdən hazır olmalıdır.
Bu günədək MKR banklarla yanaşı, QBKT-nin də informasiya bazasını yaradıb. QBKT-nin kredit reyestrinə daxil olmasını təmin edən "Qeyri-bank kredit təşkilatları haqqında" qanun ölkə Parlamenti tərəfindən 2009-cu ilin sonunda qəbul edilib.
Qarantlar üzrə yeni növ hesabatların aparılmasında kredit alıcılarının zaminlik öhdəliklərindən başqa, onun zamin kimi öhdəliyi də göstəriləcək. Bundan başqa, yeni hesabat növündə kredit alıcısının cari vəzifələrinin yerinə yetirilməsi əks olunacaq.
Reyestrdə həm aktiv borclar, həm də ödənilmiş borclar, kredit üzrə girov haqqında informasiyalar var. Reyestrdəki informasiya ayda bir dəfə ayın ilk günü ərzində yeniləşir. Yeni verilən kreditlər Reyestr Xidmətinə növbəti iki iş günü ərzində göndərilir.
Hazırda reyestrin xidmətlərindən yalnız Azərbaycan bankları və onların ölkədə fəaliyyət göstərən filialları istifadə edə bilərlər. Həbibovun sözlərinə görə, ölkədə fəaliyyət göstərən 47 bankdan 41-i MKR-də təmsil olunub.
"Növbəti illərdə kredit bürosundan informasiyanın əldə edilməsinə lizinq, sığorta şirkətləri, mobil rabitə operatorları, kommunal təşkilatlar, poçt bankları buraxılacaq. Lakin bu, özəl kredit bürosu yaradıldıqdan sonra mümkün olacaq", - xidmət rəhbəri hesab edir.
MKR 2005-ci ilin martında yaradılıb. Fiziki şəxsin reyestrdə bir sorğu etməsi üçün tarif 1,1 manat, hüquqi şəxs üçün 2 manat təşkil edir. Kredit reyestri kommersiya məqsədləri güdmür, tariflər izibati xərcləri ödəmək üçün tətbiq edilib.
MKR-in yaradılması üzrə konsultant qismində "Norway Registers Develoрment", icraçı qismində isə "R.I.S.K. Company" çıxış edib. Kredit reyestrinin yaradılmasının maliyyələşdirilməsi Dünya Bankının "Maliyyə sektoruna texniki kömək" (FSTA) krediti sayəsində aparılıb.
Avqustun 12-nə rəsmi məzənnə 0,8037 AZN/USD təşkil edir.
