Avropa Komissiyası Avropanın Qonşuluq Siyasəti (AQS) çərçivəsində 2007-ci il üçün Azərbaycanın ilkin büdcəsini müəyyən edib. Avropa Birliyinin Azərbaycana texniki yardım (TACİS) proqramının koordinasiya bürosunun icraçı direktoru Əsgər Ələkbərovun Trend ə verdiyi məlumata görə, ölkə üçün 17-19 mln. avro civarında vəsaitin ayrılması nəzərdə tutulub.
"Sonrakı illərdə büdcə artırlacaq. 2007-2010-cu illər üçün indikativ proqramın büdcəsi təsdiq olunmadığından hələlik illər üzrə bölüşdürmə yoxdur. Proqram daxili bölgü illik proqramlar hazırlandıqca həyata keçiriləcək", - deyə Ə. Ələkbərov qeyd edib. Onun sözlərinə görə, indikativ proqramın işlənilməsinə artıq başlanılıb.
İyul ayında Bakıda keçirilmiş məsləhətləşmələrdən sonra Avropa Komissiyası proqramın ilkin variantını hazırlayıb. Hazırda sənəd Azərbaycan dövlət strukturlarında idarələrarası razılaşdırılır. İlin sonuna qədər onun təsdiqlənəcəyi gözlənilir.
Avropa Komissiyası maliyyələşdirməni iki proqram - TACIS və MEDA çərçivəsində həyata keçirmək niyyətindədir. 2007-2013-cü illər üçün AQS-nin büdcəsi 15 mlrd. avro nəzərdə tutulub, bu isə 2000-ci ildən 2006-cı ilə qədər olan müddət ərzində maliyyələşdirmənin həcmindən 2 dəfə çoxdur. Bu vəsaitlər ölkələr arasında paylaşdırılacaq. AB texniki yardımla yanaşı, maliyyələşdirmənin yeni alətlərini, o cümlədən treninq alətlərini təqdim etməyə hazırdır.
Ölkədə demokratiyanın gücləndirilməsi, işgüzar və investisiya mühitinin yaxşılaşdırılması, davamlı iqtisadi inkişafın dəstəklənməsi, iqtisadiyyat sahəsində qanunvericiliyin və idarəçilik təcrübəsinin uyğunlaşdırılması, energetika və nəqliyyat sahələrində AB və AR arasında əməkdaşlığın, regional əməkdaşlığın gücləndirilməsi, sərhədyanı idarəçilik sahəsində əməkdaşlıq və s. Azərbaycan üçün fəaliyyət planında prioritet istiqamətlər kimi müəyyən olunub. Tədbirlər üç əsas prioritet sahələrə - idarəçilik sisteminin təkmilləşdirilməsi, iqtisadi və sosial islahatlar, energetika, nəqliyyat, ekologiya və infrasturktur sahələrinə bölünüb.
