...

Cənubi Qafqaz boru kəmərinin genişləndirilməsi üzrə işlərin 96 faizi başa çatıb

Energetika Materials 17 Avqust 2017 16:54 (UTC +04:00)
2017-ci ilin birinci yarısında Cənubi Qafqaz boru kəmərinin (CQBK) genişləndirilməsi üzrə işlər Azərbaycan və Gürcüstanda boru kəməri marşrutu boyunca uğurla davam edib.
Cənubi Qafqaz boru kəmərinin genişləndirilməsi üzrə işlərin 96 faizi başa çatıb

Bakı. Trend:

2017-ci ilin birinci yarısında Cənubi Qafqaz boru kəmərinin (CQBK) genişləndirilməsi üzrə işlər Azərbaycan və Gürcüstanda boru kəməri marşrutu boyunca uğurla davam edib. Ümumilikdə bu işlərin – tikinti və istismar sınaqları daxil olmaqla, 96%-i artıq tamamlanıb.

Trend-in məlumatına görə, bu barədə "BP Azərbaycan"ın ilin 6 ayının yekunları üzrə hesabatında deyilir.

Azərbaycanda kəmər xəttinin inşası üzrə tikinti işləri irəliləməkdə davam edib – təqribən 370 km uzunluğunda borular artıq qaynaq edilib, 263 km boru xəndəyə endirilib və üstü örtülüb. Planlaşdırılmış 5 üfüqi qazma işinin hamısı tamamlanıb – beşinci üfüqi qazma bu ilin aprel ayında başa çatıb.

Gürcüstan ərazisində kəmər xəttinin inşası üzrə tikinti işləri artıq bitib – 62 km uzunluğunda borular qaynaq edilib, örtüklənib, xəndəyə endirilib və üstü örtülüb.

Həm Azərbaycanda, həm də Gürcüstanda boru kəmərinin hidro-sınaqları aparılır. Azərbaycanda 5, Gürcüstanda isə 11 hidro-sınaq bölməsində işlər bitib.

Gürcüstanda hər iki kompressor stansiyasında tikinti-quraşdırma işləri davam edir. 1-ci kompressor stansiyasında işlər təqribən 99%, 2-cidə isə 82% tamamlanıb. Hər iki kompressor stansiyası 2018-ci ildə istismara verilmək planına uyğun irəliləyir. Nəzarət-ölçü stansiyasında (81-ci sahə) isə işlər 98% tamamlanıb. Bu stansiyanın 2017-ci ildə təhvil verilməsi planlaşdırılır.

2017-ci ilin birinci yarısında CQBK ilə bağlı fəaliyyətlərə təqribən 14 milyon dollar əməliyyat xərcləri və 413 milyon dollar əsaslı xərclər sərf edilib.

Bu boru kəməri 2006-cı ilin sonlarında istismara verilib və Azərbaycan, Gürcüstan və Türkiyəyə Şahdəniz qazını çatdırır.

Birinci yarımil ərzində CQBK-nin gündəlik orta ötürücülük gücü təqribən 21,4 milyon kubmetr qaz olub.

Cənubi Qafqaz Boru Kəməri şirkətinin sərmayədarları bunlardır: BP (28,8%), AzCQBK (10%), Cənub Qaz Dəhlizi Midstrim (6,7%), Petronas (15,5%), LUKOYL (10%), NİKO (10%) və TPAO (19%).

Məqalədə:
Xəbər lenti

Xəbər lenti