Azərbaycan, Bakı, 29 may /Trend, müxbir H.Vəliyev/
Azərbaycanın "Azerspace" telekommunikasiya peyki rəqəmsal teleradioyayım xidmətlərinin təqdim olunması, internet şəbəkəsinə giriş, VSAT multiservis şəbəkəsinin yaradılması, eləcə də hökumət əlaqələri üçün nəzərdə tutulub. Bu barədə Rabitə və İnformasiya Texnologiyaları Nazirliyinin telekommunikasiya şöbəsinin baş məsləhətçisi Qulam Abdullayev Trend-ə bildirib.
Abdullayevin sözlərinə görə, fərdi telekommunikasiya peykinin mövcud olması operatorlar tərəfindən göstərilən rabitə xidmətləri üzrə tariflərin azalmasına əhəmiyyətli dərəcədə təsir edəcək.
"Azerspace" peyki C diapozonlu 24 transponderlə (tezlik zolağı 4-6 GHz) və Ku diapozonlu 12 transponderlə (tezlik zolağı 11-13 GHz) təchiz olunacaq. Peyk 46 dərəcə şərq uzunluq dairəsində yerləşəcək. Peykin orbitdə istismar müddəti 20 ilə qədər təşkil edəcək.
"Azerspace"in xidmət zonasına Avropa, Mərkəzi Asiya və Afrika ölkələri daxil olacaq.
Nazirliyin bir az əvvəl verdiyi xəbərə görə, sonrakı 15 il ərzində Azərbaycanın peyk sisteminin həcminə tələbatı təxminən 1700 Mbit/s təşkil edəcək.
Bu günə ölkənin peyk sistemlərindən istifadə həcmi 120 Mbit/s təşkil edir, bu həcmin əhəmiyyətli hissəsindən VSAT (Very Small Aperture Terminal) sistemində, yerdə qalanı isə tele və radiokanalların ehtiyacları üçün istifadə olunur.
Beynəlxal və şəhərlərarası rabitənin bir hissəsi yayımlanan tele və radiokanalların tərkib hissəsi olan peyk kanalları vasitəsilə həyata keçirilir.
"Azerspace" milli peykinin buraxılışı layihəsinin həyata keçirilməsi telekommunikasiya və rabitənin kosmik sistemləri sahəsində yeni texnologiyaların tətbiqinə, informasiya müstəqilliyini təmin etməyə və vahid informasiya məkanını formalaşdırmağa imkan verəcək.
Bu gün ölkə rabitə və teleyayım üçün xarici peyklərin transponderlərindən icarəyə görə hər il milyonlarla dollar vəsait sərf edir. Beynəlxalq təcrübəyə görə, altı-səkkiz transponderin icarəsi ildə təxminən 9-10 milyon dollara başa gəlir.
Milli peykin buraxılışı bu problemi həll etməyə imkan verəcək. Yaradılmasına 112 milyon dollar vəsait sərf olunması planlaşdırılan peykin öz xərcini beş-yeddi ilə çıxaracağı nəzərdə tutulub.
Kosmik sənayenin inkişafı üzrə dövlət proqramına uyğun olaraq, nazirliyin gələcək planlarına DVB-S (Digital Video Broadcasting - Satellite) standartının inkişafı üçün peyk stansiyalarının genişləndirilməsi daxildir ki, həmin standart geniş məkanda istənilən nöqtəyə sürətli, etibarlı və qənaətli üsullarla yüksək keyfiyyətli televiziya siqnallarının verilməsini təmin edir.