Azərbaycan, Bakı, 12 avqust /Trend, müxbir H. Vəliyev/
İlin sonuna kimi Azərbaycanın ilk telekommunikasiya peyki olan Azerspace/Africasat-1a-da əldə edəcəyi gəlir təxminən 10 milyon dollar təşkil edəcək. Bu barədə Trend-ə "Azərkosmos" ASC-dən məlumat verilib.
ASC-dən bildiriblər ki, hazırda peyk operator tərəfindən peykin resurslarının 50 faizdən çoxu reallaşdırılıb.
Peyk vasitəsilə səkkizi yerli (AzTV, ITV, CBC, Xəzər TV, ANS TV, Mədəniyyət TV, İdman Azərbaycan, Azad Azərbaycan TV) olmaqla 50-dən artıq televiziya kanalı yayımlanır.
Hazırda telekanallar həm standart, həm də Azerspace/Africasat-1a peyki vasitəsilə birbaşa yayımlanır. Televiziya kanalları ilə yanaşı peyk vasitəsilə, o cümlədən radiokanalların da yayımı həyata keçirilir.
Televiziya kontentinə baxmaq üçün istifadəçilər peyk qəbuledicilərini bu formada tənzimləməlidirlər: tezlik - 11169 MHz, sürət - 20400, polyarlaşma - Horizontal və FEC - 5/6.
