Azərbaycan, Bakı, 8 mart /Trend/
Bakıda qanunsuz dövriyyədən narkotik vasitələr çıxarılıb.
Bakı şəhər Baş Polis İdarəsindən cümə axşamı Trend-ə bildirilib ki, Nəsimi Rayon Polis İdarəsinin Narkotiklərlə Mübarizə Bölməsinin əməkdaşlarının keçirdikləri əməliyyat tədbirləri nəticəsində Bakı şəhər sakini, əvvəllər məhkum olunmuş Rauf Cəfərovdan 1 qramdan artıq heroin götürülmüş və ona narkotik vasitəni satan A.Mustafayev küçəsində yaşayan Mirzəbaba Abdullayev tutulmuşdur. Abdullayevdən 20 qramdan artıq, yaşadığı mənzildən isə 1 kiloqramdan artıq heroin aşkar olunaraq götürülmüşdür.
Eyni zamanda, Suraxanı RPİ Narkotiklərlə Mübarizə Qrupu və 32-ci Polis Bölməsinin əməkdaşlarının keçirdikləri əməliyyat tədbirləri nəticəsində Əmircan qəsəbə sakini Vüqar Əliyevdən 480 qram narkotik vasitə olan marixuana aşkar edilib.