Azərbaycan, Bakı, 27 noyabr / Trend , müxbir İ.Əlizadə/ Azərbaycan Xalq Cəbhəsi və Müsavat partiyaları müxalifətin yeni birliyinin yaranmamasına görə bir - birini ittiham edirlər.
"Müsavat Partiyasının tutduğu mövqe müxalifətin birliyinin yaranmasına mane olur", - cümə günü Trend - a müxalifəti təmsil edən sağ-mərkəzçi Azərbaycan Xalq Cəbhəsi Partiyası (AXCP) sədrinin müavini Fuad Mustafayev bildirib.
Trend - un arayışı: Müxalifətin Əməkdaşlıq Mərkəzinə "Azadlıq" bloku (Azərbaycan Xalq Cəbhəsi, Liberal, Vətəndaş və İnkişaf partiyalars), Müsavat Partiaysı və "Azərbaycan Naminə" İctimai Forum (ANİF) daxildir. Sentyabrın əvvəlində bu siyasi təşkilatlar oktyabrın 15 - də keçirilən prezident seçkisinin nəticələrini tanımamaq barədə birgə bəyanat imzalayıblar.
Seçkidən sonra müxalifətin daha geniş koalisiyada birləşməsi istiqamətində danışıqlar başlasa da, qarşılıqlı ittihamlar üzündən müxalifətin geniş koalisiyasının yaranması baş tutmur.
Mustafayev qeyd edib ki, müxalifətin birliyinin yaranmaması Müsavat Partiyasına da ciddi uğurlar vəd etmir.
"Bizim təqdim etdiyimiz təkliflər müxalifətin birliyinə aparan çox doğru yolu əks etdirir. Müsavat Partiyası müxalifətin inteqrasiyası prosesində iştirak etməyə tam hazır deyil. Ona görə də, mərhələli inteqrasiya planı təklif etmişdik. İndiki mərhələdə müxalifətin birliyi formasının tapılmasını, "Müxalifətin Əməkdaşlıq Mərkəzi" şərti adı altında fəaliyyət göstərən qurumların daha sıx birləşmələrini və inteqrasiyanın yeni bir mərhələsinə başlamağı təklif edirdik. Biz nə seçki blokunun elan olunmasını, nə də başqa bir blokun yaradılmasını təklif etmişik. Bu sonrakı mərhələdə ola bilər", - deyə o əlavə edib.
Mustafayevin fikrincə, Müsavat Partiyasının birliyin yaradılmasında iştirak etməməsi ilə bağlı arqumentləri əsaslı deyil. Sədr müavini deyib ki, yeni birliyə Azərbaycan Demokrat və digər partiyaların da təmsil olunmasını təklif etmək, birliyin yaranmasını istəməmək deməkdir; həmin siyasi partiyaların heç biri ,istər Azərbaycanda gedən proseslər, istərsə də, hakimiyyət - müxalifət münasibətləri baxımından, müxalifətin bu gunkü mövqeyini bölüşmür.
Onun sözlərinə görə, hazırladıqları təkliflərin mahiyyətində real siyasi qüvvələrin əməkdaşlığı nəzərdə tutulub. "Yanlız o siyasi qüvvələr nəticəli əməkdaşlıq edə bilərlər ki, onların Azərbaycanda gedən siyasi proseslərə vahid yanaşmaları var. Bu formatı Xalq Cəbhəsi, Vətəndaş və İnkişaf, Liberal, Müsavat partiyaları və "Azərbaycan Naminə" İctimai Forumun bir yerdə olmasında görürük. Təəssüf edirəm ki, Müsavat Partiyası təklifləri qəbul etməkdə ciddi tərəddüd edir", - deyə o əlavə edib.
AXCP rəsmisi vurğulayıb ki, Müsavat Partiyasının arqumentlərinin nə qədər əsassız olduğunu zaman göstərəcək".
Müsavat Partiyası Mərkəzi İcra Aparatının rəhbəri Arif Hacılı isə, Trend -a bildirib ki, təmsil etdiyi siyasi təşkilat müxalifətin birliyinin yaranmasına etiraz etmir və bununla bağlı müzakirələrə hazırdır.
"Biz br sıra partiyalar, o cümlədən AXCP ilə müttəfiqlik formasında da əməkdaşlığa hazırıq. Qarşı tərəfdən fərqli olaraq, biz heç bir şərt irəli sürmürük. Ona görə də, Müsavat Partiyasını yeni birliyin yaranmasına mane olmaqda ittiham etmək anlaşılmaz mövqedir", - deyə Hacılı əlavə edib.
Müxalifəti təmsil edən AXCP hazırda "Azadlıq" siyasi blokunun üzvü və həmtəsisçisidir. Partiyanın qurucusu və 2000 - ci ilədək sədri Azərbaycanın eks - prezidenti mərhum Əbülfəz Elçibəy olub. 2000 - ci ildən AXCP-yə keçmiş Dövlət Katibi, sabiq deputat Əli Kərimli sədrlik edir.
Müsavat Partiyası 1911- ci ilin oktyabrında Bakıda yaradılıb. Müsavat Partiyasının III (Bərpa) Qurultayı 1992- ci il noyabrın 7- də Bakıda Respublika sarayında keçirilib. Gizli səsvermənin yekunları əsasında Qəmbər səs çoxluğu ilə Müsavat Partiyasının başqanı seçilib.
Qəmbər Azərbaycan parlamentinin spikeri (1992-1993-cü illərdə) və 2003- cü ildə keçirilmiş prezident seçkisində prezidentliyə namizəd olub. Partiya 4 nəfər deputatla parlamentdə təmsil olunur.
Məqalə müəllifi ilə əlaqə saxlamaq üçün ünvan: [email protected]
