Azərbaycan, Bаkı, 11 mart / Trend , müxbir A.Hüseynbala /
Azərbaycan müxalifəti prezident seçkisində olduğu kimi, referendumla bağlı kampaniyada da vahid mövqedən çıxış edə bilmədi.
"Müxalifətin birləşməsınə mane olan əsas səbəb liderlərin ambisiyaları, bir-birlərini qəbul etməmələridir. Təmsil olunduğum partiyada müxalifətin birliyinin baş tutmaması ilə bağlı gətirilən arqumentlər məni qane etməyib", - çərşənbə günü Trend -a Klassik Xalq Cəbhəsi Partiyası (KXCP) Ali Məclisinin sədri Zəlimxan Məmmədli bildirib.
Trend - un arayışı: Azərbaycanda 2008-ci ilin oktyabr ayında keçirilən prezident seçkisindən sonra prezident seçkisinin nəticələrini tanımayan Müxalifətin Əməkdaşlıq Mərkəzində təmsil olunan Müsavat və Azərbaycan Xalq Cəbhəsi partiyaları müxalifətin gələcək əməkdaşlığını nəzərdə tutan layihələr hazırlayıblar.
Seçkidən sonra müxalifətin daha geniş koalisiyada birləşməsi istiqamətində danışıqlar başlasa da, qarşılıqlı ittihamlar nəticəsində hələki müxalifətin geniş koalisiyasının yaranması baş tutmur.
Müxalifətin Əməkdaşlıq Mərkəzinə "Azadlıq" bloku (Azərbaycan Xalq Cəbhəsi, Liberal, Vətəndaş və İnkişaf partiyaları), Müsavat Partiaysı və "Azərbaycan Naminə" İctimai Forum (ANİF) daxildir.
Məmmədlinin sözlərinə görə, bütün müxalif qüvvələrin problemlərdən danışıb, "Qarabağ münaqişəsinin nizamlanması üçün fədakarlıq göstərməyə hazırıq" deyib, eyni hədəflər uğrunda birləşə bilməməsi təəssüf doğurur.
Onun fikrincə, müxalif qüvvələrin bir yerdə ola bilməməsinin digər səbəbi onların bir-birinə qarşı düşmənçilik mövqeyidir. "Bu durum hazırki siyasi arenamızın faciəli durumda olduğunu bir daha təsdiqləyir", - Məmmədli vurğulayıb.
KXCP Ali Məclisinin rəhbəri deyib ki, müxalifətin maksimum on liderinin birliyi Azərbaycan cəmiyyətinin çox ciddi problemlərini indi həll etmək iqtidarındadır. "Mənim qənaətimə görə, şəxsi ambisiyalar ideoloji-milli dəyərləri kifayət qədər üstələyib və Azərbaycanın siyasi partiyaları arasında ideoloji yox, liderlərin bir-birinə qarşı mübarizəsi gedir", - Məmmədli bildirib.
Məmmədli deyib ki, müxalifətin birgə mübarizə apara bilməməsinə görə, liderlər birbaşa məsuliyyət daşıyırlar. "Mən müxalifətin referendumdan sonra hansısa ümidverici əməkdaşlığının baş tutacağına inanmıram", - Ali Məclis sədri qeyd edib.
2006-cı ilin mаrt аyındа Klаssik Хаlq Cəbhəsi Pаrtiyаsının təsis qurultаyı kеçirilib. Həmin vахtа qədər pаrtiyа Аzərbаycаn Хаlq Cəbhəsi Pаrtiyаsı аdınа iddiа еdirdi və "Klаssiklər" АХCP-si kimi tаnınırdı. Аzərbаycаnın еks-prеzidеnti, АХCP-nin sədri Əbülfəz Еlçibəyin müаvini оlmuş Mirmаhmud Mirəliоğlu 2000-ci ildə pаrtiyаnın iki yеrə pаrçаlаnmаsındаn sоnrа "Klаssiklər" qаnаdınа sədrlik еdib. 2006-cı ildə pаrtiyаnın аdındа dəyişiklik еdilərək KХCP аdlаndırılıb.
Məqalə müəllifi ilə əlaqə ünvanı:[email protected]
