Azərbaycan, Bakı, 22 iyun /Trend, müxbir T.Konyayeva/
İrana qarşı yeni sanksiyalar diplomatik təzyiq vasitəsidir, lakin bu, Avropa İttifaqının (Aİ) İrana münasibətdə həyata keçirdiyi daha geniş siyasəti əvəz etmir. Buna görə də İran üçün Avropa İttifaqı gələcək danışıqlara açıq olmalıdır. Avropa Parlamentinin üzvü Barbara Loxbihler belə hesab edir.
"Avropa İttifaqı İranla danışıqlar üçün qapıları açıq saxlamalıdır, - Avropa Parlamentinin İranla münasibətlər üzrə nümayəndə heyətinin rəhbəri Loxbihler Trend-ə müsahibəsində deyib. - Biz qarşılıqlı etimadın bərpası üçün digər sahələrdə əməkdaşlıq imkanlarını öyrənməliyik".
BMT-nin Təhlükəsizlik Şurası iyunun 9-da İrana qarşı yeni sanksiyaları nəzərdə tutan qətnamə qəbul edib. Bu, İranın uranın zəngilləşdirilməsi üzrə aparılan işləri dayandırmaqdan imtina etməsindən sonra baş verib.
Loxbihlerin sözlərinə görə, Avropa sanksiyaları İran rəhbərliyini nüvə dosyesi ilə bağlı ciddi və ətraflı danışıqlara qaytarmaq məqsədi daşıyır.
"Yeni "ağıllı sanksiyalar" İslam İnqilabı Keşikçiləri Korpusunun (İİKK) fəallarına qarşı yönəlib və insanların həyatını çətinləşdirməyə xidmət etmir", - o deyib.
İİKK 1979-cu ildə ayətullah Ruhulla Musəvi Xomeyninin tərəfdarlarından ibarət islam inqilabı komitələri dəstələrindən yaradılan elitar bölmədir. İİKK-nın bir çox üzvləri hökumətdə təmsil olunublar və onların sayı artmaqdadır.
İİKK cəmiyyətdə real hakimiyyətdir və təkcə inzibati sahədə deyil, eləcə də iqtisadiyyatın maliyyə və kommersiya sahələrində təmsil olunub. İİKK müdafiə, tikinti, neft sahəsində geniş iqtisadi maraqlara malikdir.
Loxbihlerin fikrincə, Avropa Parlamenti əhaliyə təsir edə biləcək, məsələn, yanacağın verilişinin dayandırılması kimi geniş sanksiyalara qarşı çıxır.
"Hazırkı rejimin sənaye təhlükəsizliyinin təminatına qarşı yönələn yeni sanksiyalar əhalinin geniş təbəqələrinə təsir etmir", - o bildirib.
ABŞ, İsrail və bir sıra Avropa ölkələri İranın nüvə silahı istehsal etmək niyyətində olduğundan şübhələnirlər. İran bunu rədd edir və onun nüvə proqramının istisnasız olaraq dinc xaraker daşıdığını bəyan edir.
Sanksiyaların təsir edə biləcəyi şəxslər arasında Loxbihler iqtisadi cəhətdən nüfuzlu İİKK-ya məxsus şirkətlərdə çalışanların adlarını çəkib.
Onun fikrincə, İran hökuməti sanksiyaların tətbiqindən əsas qida məhsullarının və fəlakətli iqtisadi vəziyyətin subsidiyalaşdırılmasının azaldılması üçün bəraət kimi istifadə edə bilər.
"Lakin ümid edirəm ki, iranlılar anlayacaqlar ki, bu siyasət başlıca olaraq diqqəti daxili problemlərdən yayındırmaq məqsədi daşıyır", - o deyib.
Loxbihlerin sözlərinə görə, Avropa İrandakı vətəndaş cəmiyyəti ilə dialoqu və ona dəstəyi davam etdirməlidir.
"İranlılara göstərmək lazımdır ki, Avropa təkcə nüvə problemi ilə deyil, həm də insanlar və onların hüquqları ilə də maraqlanır, - o bildirib. - Biz hər gün demokratiya və insan haqları naminə həyatını riskə atan İran xalqı ilə həmrəyliyimizi ifadə etməliyik".
Loxbihler qeyd edib ki, İran rejiminin insan haqları üzrə beynəlxalq konvensiyanı pozması və hakimiyyətdən sui-istifadə üzrə yol verdiyi hər bir halın tənqid olunması vacibdir.
"Lakin dəyişikliklər hər şeydən əvvəl İranın öz daxilində baş verməlidir", - o deyib.