Milli Təhlükəsizlik Nazirliyi cəzaçəkmə müəssisəsindən qaçan məhkumun tutulması faktı ilə bağlı məlumat yayıb

Azərbaycan, Bakı, 10 dekabr /Trend, müxbir K.Zərbalıyeva/

Azərbaycan Milli Təhlükəsizlik Nazirliyi 2 saylı məntəqə tipli cəzaçəkmə müəssisəsindən qaçan məhkumun tutulması faktı ilə bağlı məlumat yayıb.

Trend-in şənbə günü MTN-in İctimaiyyətlə Əlaqələr Mərkəzinə istinadən yaydığı məlumata görə, dekabrın 8-də saat 21:00 radələrində Ədliyyə Nazirliyi Penitensiar Xidmətin Qaradağ rayonu ərazisində yerləşən 2 saylı məntəqə tipli cəzaçəkmə müəssisəsindəki (MTCM) məhkumlarla əlaqədar baş vermiş insident və həmin məhkumlardan birinin - Bakı şəhər sakini, 1983-cü il təvəllüdlü Fərəcov Faiq Fuad oğlunun MTCM-dən qaçması barədə Milli Təhlükəsizlik Nazirliyinə məlumat daxil olub.

Faktla bağlı Nazirliyin müvafiq əməliyyat strukturlarına tapşırıqlar verilib və Faiq Fərəcovun tutulması istiqamətində zəruri əməliyyat-axtarış tədbirləri həyata keçirilib. Dekabrın 9-da axşam saat 20:30 radələrində Bakı şəhəri, Yasamal rayonu, Şəhriyar küçəsində yerləşən "Asfar" qapalı futbol kompleksinin ərazisində Milli Təhlükəsizlik Nazirliyinin əməliyyat qrupu tərəfindən Faiq Fərəcov yaxalanıb və Ədliyyə Nazirliyi Penitensiar Xidmətin əməkdaşlarına təhvil verilib.