Azərbaycan, Bakı, 13 may /Trend, müxbir H.Vəliyev/
Fransanın "Airbus Defence and Space" şirkəti Azərbaycanın peyk resurslarının reallaşdırılması ilə məşğul olacaq.
Rabitə və Yüksək Texnologiyalar Nazirliyindən Trend-ə verilən məlumata görə, bunu ötən gün rabitə və yüksək texnologiyalar naziri Əli Abbasovun Fransa nümayəndə heyəti ilə görüşündə "Airbus Defence and Space"un kosmik sistemlər üzrə icraçı vitse-prezidenti Fransua Ok deyib.
Onun sözlərinə görə, Azərbaycan kosmik sahəyə, peyk resurslarının reallaşdırılmasına böyük maraq göstərir.
F.Ok bildirib ki, "EADS-Astrium" və "Azərkosmos" ASC arasında imzalanmış anlaşma memorandumunda əksini tapmış iki ölkənin əməkdaşlığının əsas aspektlərindən biri peyk resurslarının reallaşdırılması sahəsidir.
O, qeyd edib ki, tərəfləri kommersiya maraqları və həmin sahədə strateji əməkdaşlığın mövcud potensialı birləşdirir.
"EADS-Astrium" şirkəti azərbaycanlı mütəxəssislərin peyklərin idarə edilməsi sahəsində öyrədilməsi xidmətini də təklif edib.