Azərbaycan, Bakı, 19 noyabr /Trend, müxbir S.Ağayeva/
Azərbaycan XİN ATƏT-in səhra qiymətləndirmə missiyasının Ermənistanın işğal etdiyi Azərbaycan ərazilərindəki vəziyyətlə bağlı hesabatının nazirliyə təqdim olunması barədə məlumatı təkzib edib.
"Azərbaycanın Xarici İşlər Nazirliyinə ATƏT-in səhra qiymətləndirmə missiyasının hesabatı daxil olmayıb", - XİN rəsmi nümayəndəsi Elxan Poluxov cümə günü Trend-ə deyib.
ATƏT-in səhra qiymətləndirmə missiyası oktyabrın 4-dən 14-dək Azərbaycanın işğal olunmuş ərazilərində baş tutub. ATƏT-in Minsk qrupunun həmsədrlərini BMT Qaçqınlarla İş üzrə Ali Komissarlığın nümayəndələri müşayiət edib.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.