Azərbaycan, Bakı, 20 may / Trend , müxbir Y.Оstapenko /
"Avropa Parlamentinin (AP) "Aİ-Şərq tərəfdaşlığı" Parlament Assambleyasının yaradılması "Şərq tərəfdaşlığı" ölkələri ilə ikitərəfli münasibətlərin əvəzlənməsi deyil, onların hər biri ilə münasibətlərin genişləndirilməsi və onlara əlavələr edilməsi üçün lazımdır", - AP prezidentinin müşaviri Robert Qolanski bildirib.
"Avropa Parlamentinin "Aİ-Şərq tərəfdaşlığı" Parlament Assambleyası "Şərq tərəfdaşlığ"ın daha yüksək səviyyədə - dövlət və hökumətlər səviyyəsində həyata keçirdiyi fəaliyyəti parlament səviyyəsində edəcək", - Qolanski Trend -a Brüsseldən telefonla deyib. - Buna görə də əsas məqsəd Aİ və altı şərq qonşumuz arasında əməkdaşlığın fəallaşdırılmasıdır".
Bazar ertəsi Kiyevdə Avropa Parlamentinin "Aİ-Şərq tərəfdaşlığı" Parlament Assambleyasının yaradılması ilə bağlı müşavirə keçirilib.
"Kiyevdəki müzakirələr zamanı tərəflər bu strukturun yaradılmasına razılaşıb", - bir müddət əvvəl Trend -a görüşdə iştirak etmiş, Milli Məclisin hüquq siyasəti və dövlət quruculuğu komitəsinin sədr müavini Rövşən Rzayev məlumat verib.
AP prezidentinin müşaviri deyib ki, istənilən böyük layihə parlament əməkdaşlığı ilə tamamlanır. Misal kimi Qolanski Aİ-nin Aralıq dənizi regionu, həmçinin Latın Amerikası ölkələri ilə parlament əməkdaşlığını göstərib.
"Bu nöqteyi-nəzərdən Avropa Parlamentinin "Aİ-Şərqi tərəfdaşlıq" Parlament Assambleyası digər xarici siyasət layihələri ilə uyğunluq təşkil edir", - o, deyib.
"Aİ-Şərq tərəfdaşlığı" Parlament Assambleyası, Qolanskinin sözlərinə görə, 120 üzvdən ibarət olacaq: 60 AP nümayəndəsi və hər iştirakçı ölkədən 10 parlament nümayəndəsi.
"Yalnız Belarus nümayəndələrinin məsələsi açıq qalır", - Qolanski məlumat verib.
"Belarusu kimin təmsil edəcəyini müəyyən etmək lazımdır. Çünki bu ölkənin parlamenti demokratik standartlara əsasən seçilməyib və Aİ tərəfindən tanınmır", - o qeyd edib.
Qolanskinin fikrincə, "Aİ-Şərq tərəfdaşlığı" Parlament Assambleyası işinə payızdan tez başlaya bilməyəcək, çünki o, yalnız iyunda Avropa Parlamentinə keçiriləcək seçkilərdən sonra formalaşdırıla bilər. Seçkilərdən sonra isə avro-parlamentarilər yay tətilinə çıxırlar.
"Şərq tərəfdaşlığı" Polşa və İsveçin qonşuluq siyasəti çərçivəsində Aİ-nin postsovet ölkələri ilə münasibətlərinin yaxşılaşdırlmasına yönəldilmiş təşəbbüsüdür. "Şərq tərəfdaşlığı" Aİ-nin altı qonşu ölkəsini əhatə edir: Azərbaycan, Gürcüstan, Ermənistan, Moldova, Belarus və Ukrayna.
Bu təşkilat çərçivəsində vizaların götürülməsi, azad ticarət zonalarının tətbiqi və strateji müqavilələrin imzalanması üzrə danışıqlar aparılacaq. Həmçinin tələbələrlə mübadilə, ətraf mühitin mühafizəsi, enerji təminatı kimi kiçik layihələr həyata keçiriləcək.
"Şərq tərəfdaşlığı" proqramı rəsmi olaraq mayın 7-də Aİ-nin Praqadakı sammitində qüvvəyə minib.
Məqalə müəllifi ilə əlaqə ünvanı: [email protected]