Azərbaycan, Bakı, 16 aprel /Trend, müxbir K.Zərbalıyeva/
Azərbaycan Ombudsmanı polis şöbəsində baş vermiş ölüm faktı ilə bağlı araşdırma aparıb.
Ombudsman Aparatının mətbuat xidmətindən cümə günü Trend-ə verilən məlumata görə, aprelin 14-də Salyan Rayon Polis Şöbəsinin (RPŞ) müvəqqəti saxlama təcridxanasında saxlanılan Vüqar Əzizovun ölümü ilə bağlı məsələ Ombudsmanın İşgəncə və digər qəddar, qeyri-insani və ya ləyaqəti alçaldan rəftar və ya cəzaların qarşısının alınması üzrə Milli Preventiv Mexanizm (MPM) Qrupunun üzvləri tərəfindən araşdırılıb.
Araşdırma zamanı müəyyən edilib ki, Salyan RPŞ-in MST-də saxlanılan, əvvəllər narkotik cinayəti üstündə dəfələrlə məhkum edilmiş Salyan şəhər sakini barəsində, aprelin 9-da şöbənin istintaq bölməsinin baş müstəntiqi tərəfindən cinayət işi qaldırılıb.
O, Cinayət Məcəlləsinin 234.2-ci maddəsi ilə təqsirləndirilən şəxs qismində cəlb edilib, Salyan Rayon Məhkəməsi tərəfindən barəsində 2 ay müddətinə həbs qətimkan tədbiri seçilib.
Əzizov "narkotiklərdən fiziki asılılıq və arterial hematomiya" diaqnozu ilə rayon mərkəzi xəstəxanasının reanimasiya şöbəsinə yerləşdirilib.
Lakin göstərilən bütün tibbi müdaxilələrə baxmayaraq, o, saat 05:00-da xəstəxanada vəfat edib. İlkin müayinə zamanı bədənində hər hansı xəsarət izi aşkar olunmayıb.
Həmin gün Səhiyyə Nazirliyi Məhkəmə-Tibb Ekspertizası və Patoloji Anatomiya Birliyinin Salyan rayonlararası zona mərkəzində meyit xarici və daxili müayinədən keçirilib.
Faktla bağlı Salyan Rayon Prokurorluğunda araşdırma aparılır.