Bakı. Trend:
İranın Azərbaycandakı səfiri Möhsün Pakayin və İran Mədəniyyət Mərkəzinin rəhbəri İbrahim İbrahimi Bakı Dövlət Universitetində olublar.
Universitetin Mətbuat və informasiya şöbəsindən Trend-ə verilən məlumata görə, qonaqları salamlayan rektor, akademik Abel Məhərrəmov onları yenidən universitetdə görməkdən məmnun olduğunu bildirib. Bu ilin avqustunda Azərbaycan, İran və Rusiya prezidentlərinin üçtərəfli zirvə görüşünün əhəmiyyətindən danışan rektor, görüşün ölkələrarası münasibətlərin daha yüksək səviyyəyə qalxmasına yaxşı imkanlar yaradacağını qeyd edib.
Eyni zamanda İran universitetləri ilə əlaqələrdən bəhs edən rektor, BDU-da fars dili və ədəbiyyatının tədrisi, birgə elmi əməkdaşlıq, hər iki ölkə alimlərinin müəllifliyi ilə elmi jurnalın işıq üzü görməsi, İran filologiyası kafedrasında davamlı olaraq fars dili olimpiadası və bayramının keçirilməsi, kafedra müəllimlərinin İran universitetlərində təşkil olunan seminar və konfranslarda iştirakı kimi məsələləri yüksək qiymətləndirərək bütün bu işlərdə səfirlik və Mədəniyyət Mərkəzinin dəstəyini xüsusilə qeyd edib. Tehran Universitetinin rektoru, doktor Nili Əhmədabadinin BDU-nun 95 illik yubileyində iştirakını, əməkdaşlığa dair müqavilənin imzalandığını diqqətə çatdıran rektor, ötən il adıçəkilən universitetin 80 illik yubileyinə qatıldığını və bütün bu səfərlərin əməkdaşlığın inkişafina təsirsiz ötüşmədiyini bildirib.
Möhsün Pakayin, öz növbəsində, səfir kimi fəaliyyət göstərdiyi dörd il müddətində Bakı Dövlət Universiteti ilə əməkdaşlığı yüksək qiymətləndirib, bütün bu işlərin təşkili üçün universitet rəhbərliyinə minnətdarlığını bildirib.
Görüşdə həmçinin Təbriz Universiteti rektorunun rəhbərlik etdiyi nümayəndə heyətinin BDU-ya səfərinin nəzərdə tutulduğu diqqətə çatdırılıb, universitetdə fars dili və ədəbiyyatının yeni istiqamətdə tədrisi, kadr hazırlığı, nanotexnologiya sahəsində müəllim və tələbə mübadiləsi məsələləri də müzakirə edilib.