Bakı.Trend:
Bakı Təşəbbüs Qrupu (BTQ) və Beynəlxalq Siqh Federasiyası əməkdaşlıq haqqında Anlaşma Memorandumu imzalayıb.
Trend xəbər verir ki, sənəd Bakıda “1984-cü ilin iyunu, Amritsar hadisələri: Hindistanın etnik azlıqlara qarşı transmilli repressiyaları soyqırımı kontekstində” mövzusunda keçirilən beynəlxalq konfransın yekununda imzalanıb.
Tərəflər arasında akademik, tarixi və mədəni tədqiqatlar sahəsində əməkdaşlıq üçün əsas yaradılması məqsədini daşıyan sənəd, xüsusilə tarixi əlaqələr və mədəni qarşılıqlı fəaliyyətə diqqət yetirir.
Bu çərçivədə tərəflər bölgədə sikh səyyahları, tacirləri və dini xadimlərinin mövcudluğu ilə bağlı tarixi mənbələri, elmi materialları və mədəni sübutları, o cümlədən Atəşgah məbədi və daha geniş mədəni mübadilə kontekstini araşdıra bilərlər.
Əməkdaşlıq elmi dialoqun, obyektiv tədqiqatların, mədəni anlaşmanın təşviqinə və tarixi yaddaşın qorunmasına yönəlib.
