Azərbaycandakı ibtidai məktəb şagirdləri arasında helmintozlara qarşı mübarizə tədbiri kampaniyası başa çatıb
Azərbaycan, Bakı / Trend / BMT-nin Ümumdünya Ərzaq Proqramı (ÜƏP) beynəlxalq humanitar təşkilatı Azərbaycan Respublikası Səhiyyə Nazirliyi və Vişnevskaya-Rostropoviç fondu ilə birlikdə Azərbaycandakı ibtidai məktəb şagirdləri arasında qurd xəstəlikləri infeksiyasının mövcudluğunu xeyli dərəcədə azaltmaq üçün helmintozlara qarşı mübarizə tədbiri kampaniyası müvəffəqiyyətlə başa çatıb. Bu barədə ÜƏP-dən məlumat verilib.
2006-cı ilin dekabrında başlayan bu kampaniya ölkə əhalisinin ən yoxsul təbəqələrindən, o cümlədən məcburi köçkün əhalidən olan uşaqların səhiyyəsini və intellektual inkişafını yaxşılaşdırmaq məqsədi daşıyıb.
Kampaniya nəticəsində 6-11 yaş arasında olan 16 min uşaq gigiyena və müvafiq bilgilərin olmamasından irəli gələn ümumi xəstəlik olan və azərbaycanlı uşaqlar arasında xeyli dərəcədə müşahidə olunan qurd xəstəliyinə qarşı müalicə alıb. Həmin infeksiya 5-14 yaşlı uşaqlar arasında xüsusi şiddətlə müşahidə olunur.
Bu kampaniyanın nəticəsi olaraq ötən iki il ərzində qurd xəstəlikləri infeksiyasının mövcudluğu 2005-ci ildəki 31 faizdən 2007-ci ildə 3.2 faizə enib. Həmin kampaniya uşaqlar, müəllimlər və icmalar arasında maarifləndirmə işləri, eləcə də səhiyyə işçiləri arasında bacarıqların artırılmasına dair tədbirlər ilə müşayiət olunub.
Xəstəliyin müalicəsi üçün "Mobendazol" preparatı bu il Vişnevskaya-Rostropoviç Fondu tərəfindən təqdim olunub. Ümumilikdə 32 min həb təqdim olunub.
