Azərbaycan, Bakı, 10 sentyabr / Trend , müxbir A.Bədəlova/ "Bakıda nəqliyyatın intellektual idarəetmə sisteminin yaradılmasına sentyabrın 30-da start veriləcək", - Azərbaycan Nəqliyyat Nazirliyinin Nəqliyyat siyasəti və iqtisadiyyat şöbəsinin rəhbəri Sədrəddin Məmmədov çərşənbə günü bildirib.
Layihədə podratçı qismində çıxış edən SK C& C şirkətinin vitse-prezidentinin başçılıq etdiyi Koreya nümayəndə heyəti Bakıya gələcək.
Nəqliyyat Nazirliyi ilə imzalanan sazişə əsasən, Bakıda Seul Şəhər Nəqliyyatı Mərkəzinə analoq olan Nəzarət Mərkəzi (dispetçerizasiya) yaradılacaq.
SK C& C artıq öz nümayəndəliyini Azərbaycanda qeydiyyatdan keçirib. Hazırda şirkət layihənin ətraflı layihələndirilməsini hazırlayır. Birinci mərhələdə mərkəz Bakını, perspektivdə isə Abşeron yarımadasını əhatə edəcək. Ətraflardakı qovşaq nöqtələrində fibriooptik kommunikasiya sistemləri çıxışları hesabına mərkəzin təsiri Abşeron, Xırdalan, Sumqayıt, Gəncəyə genişləndiriləcək. O, həmçinin şəhərətrafı və şəhərlərarası daşınmalarla əlaqədə olacaq ki, bu da elektron biletlər sisteminə keçməyə imkan verəcək.
İlkin məlumatlara əsasən, belə sistemin yaradılması $55-60 mln. qiymətləndirilsə də, tikinti materiallarının bahalaşması ilə əlaqədar layihənin dəyəri hələ dəqiqləşdiriləcək. Bu vəsaitləri dövlət büdcəsindən cəlb etmək planlaşdırılır.
Başlanğıcdan Koreyanın Nəqliyyat Nazirliyi bu sistemin tətbiqində Azərbaycana yardım göstərib. 2004-cü il aprelin 24-də bu ölkənin Nəqliyyat Nazirliyi ilə Seulda Niyyət memorandumu imzalanıb. Nazirlik üçün layihəni SK C& C şirkəti hazırlayıb. O, araşdırmalar apararaq müvafiq tövsiyələri ölkə hökumətinə təqdim edib. Lakin 2008-ci ilin mayında onunla podrat xidmətlərinin göstərilməsinə dair memorandum imzalanıb. Araşdırmalara əsasən, belə sistemin tətbiqi nəticəsində işıqfor və avtobus dayanacaqlarının sayı nizamlanacaq. Körpü və piyada keçidlərinin tikintisi nəticəsində onların sayı onsuz da azalıb. Bu sistemin yaradılması avtonəqliyyat vasitələrinin hərəkəti, sürəti, dayanacaqlar, nəqliyyat qəzaları, tıxaclar və digər hallarda mərkəzi dispetçer məntəqəsinə operativ məlumat göndərməyə imkan verəcək.
Nəqliyyatın intellektual idarə sisteminin iki mərhələdə 3,5 il ərzində yaradılması nəzərdə tutulur.
Müəlliflə əlaqə saxlamaq üçün elektron ünvan: [email protected]