Azərbaycan, Bakı, 02 fevral/ Trend , müxbir N.İsmayılova/
Dünya Bankı Azərbaycanla əməkdaşlıq proqramını genişləndirməyə hazırdır, - bankın Cənubi Qafqaz üzrə keçmiş regional direktoru Donna Douset-Koyrollo bazar ertəsi Bakıda bildirib.
"Bu gün ölkənin Baş naziri Artur Rasizadə ilə görüşdə əməkdaşlıq proqramı müzakirə edilsə də, əsas diqqət bankın maliyyələşdirdiyi layihələrin həyata keçirilməsinin vəziyyətinə ayrıldı", - Douset-Koyrollo qeyd edib.
Onun sözlərinə görə, əməkdaşlıq çərçivəsində kadr potensialının gücləndirilməsinə diqqət ayrılacaq. Belə ki, hökumətin istəyi ilə böyük infrastruktur layihələrinin həyata keçirilməsinə cəlb olunmuş hökumət agentlərinin kadr potensialının artırılması üçün texniki yardım göstərilə və treninqlər keçirilə bilər. Eləcə də, nəqliyyat layihələrinin maliyyələşdirilməsini, məcburi köçkünlərin həyat səviyyəsinin inkişafına dəstəyi genişləndirmək planlaşdırılıb. Bundan başqa, Hövsanda Xəzər dənizinə atılan çirkli suların təmizlənməsi üzrə layihə hazırlanır.
İndiyədək DB Azərbaycanda ümumi dəyəri 2 mlrd. dollardan çox olan 45 layihəni maliyyələşdirib. Yalnız ötən il ərzində bank 13 layihənin maliyyələşdirməsinə 1,251 mlrd. dollardan çox vəsait yönəldib, bununla da dörd illik strategiya büdcəsini iki ilə mənimsəyib. Qarşıdakı iki ildə (2009-2010) DB ölkəyə 1 mlrd. dollardan artıq kredit ayırmağa hazır olduğunu bildirib. Bu vəsaitlər kommersiya şərtləri üzrə - Beynəlxalq Yenidənqurma və İnkişaf Assosiasiyasının şərtləri ilə veriləcək.
Ötən il DB Azərbaycanda Beynəlxalq İnkişaf Assosiasiyasının (DB-nin qrupuna daxildir) xətii üzrə güzəştli şərtlərlə maliyyələşdirməni dayandırıb. Bank, maliyyələşdirməni daha kasıb ölkələrə, xüsusilə də Afrika ölkələrinə yönəltmək niyyətindədir.
ÜDM-in adambaşına düşən həcmi 1280 dolları ötməyən ölkələr bu meyar altına düşürlər. Azərbaycan DB-nin Beynəlxalq İnkişaf Assosiasiyasından kredit almaq üçün əsas meyar qismində müəyyən etdiyi bu gəlir səviyyəsini artıq ötüb. Ötən ilin yekunlarına görə, Azərbaycanda adambaşına düşən gəlir 5403,9 dollar təşkil edib.
Müəlliflə əlaqə saxlamaq üçün elektron ünvan: [email protected]