Azərbaycan, Bakı, 15 fevral / Trend, müxbir A.Axundov/
Bu gün Azərbaycanın bank sektorunda yaranmış vəziyyət kifayət qədər stabildir. Bu barədə çərşənbə günü Trend-ə Standard&Poor's beynəlxalq reytinq agentliyinin aparıcı analitiki Viktor Nikolski məlumat verib.
Lakin onun sözlərinə görə, sistemlə bağlı kifayət qədər yüksək risklər mövcuddur.
"Bizim iqtisadi riskləri, o cümlədən hər bir ölkədə bank sənayesinin risklərini qitmətləndirən BICRA (banking industry country risk assessment) metodologiyamıza görə, Azərbaycan indi doqquzuncu qrupdadır (bu metodologiya üzrə qiymətləndirmə bir vahidlə on vahid arasında dəyişir, burada bir vahid minimal, on vahid isə maksimum risklər sisteminin qiymətləndirilməsidir)", - Nikolski bildirib.
Onun sözlərinə görə, Azərbaycanın bank sektoru böyük deyil, lakin çox cəmləşdirilmiş və yüksək rəqabətlidir.
Ekspert bildirib ki, bazarda Azərbaycan Beynəlxalq Bankının rəqabətin landşaftına əhəmiyyətli dərəcədə təsir edən hökmranlığı mövcuddur, buna baxmayaraq, bank sektorunda likvidliklə bağlı problem yoxdur.
"Vəziyyət kifayət qədər sabit görünür, amma əgər bankların kredit portfellərinə baxsaq, biz hesab edirik ki, orada çoxlu sayda risklər var, onların bir hissəsi artıq üzdədir və biz statistikada bankların kredit portfellərində ləngimələrin yüksək payını, həmçinin yenidən strukturlaşdırılmış kreditlərin əhəmiyyətli hissəsini görürük. Həmçinin elə kreditlər var ki, rəsmən vaxtı keçməyib və ya onlar yenidən strukturlaşdırılıblar. Həmin kreditlər üzrə faizlərin və əsas borcun ödənilməsinin dayandığı hansısa güzəştli dövr var, bu güzəştli dövr keçdikdən sonra onların vaxtı ötmüş ola bilmələri ehtimalı yüksəkdir. Kredit portfellərində yüksək risklər yüksək artım sürətləri olan sistemlər üçün ümumilikdə xarakterikdir", - Nikolski deyib.
Bir az əvvəl Azərbaycanın suveren reytinqi "BB+"dən "BBB-"dək artırılıb və ölkə başqa kateqoriyaya, yəni investisiya kateqoriyasına keçirilib.
"Reytinq investisiya kateqoriyası reytinqi olan kimi, bu reytinqə meylli olan bir çox investorlar öz investisiya strategiyalarına müvafiq olaraq belə institutların istiqraz vərəqəsinə investisiya qoya bilərlər. Biz, bu dəyişikliyin ölkənin bank sektoruna necə təsir edəcəyinə sözsüz ki, baxacağıq. Lakin bunun üçün bir müddət vaxt keçməsi lazımdır", - Nikolski deyib.
