Azərbaycan, Bakı, 26 mart /Trend, müxbir A.Axundov/
2014-cü ilin yanvar-fevral aylarında Azərbaycanda sığortanın icbari növləri üzrə yığımlar il ərzində 21,5 faiz artaraq 19,89 milyon manat təşkil edib, yığımların ümumi həcmində onların payı isə 20,8 faizdən 21,7 faizədək artıb. Sığortanın bu növləri üzrə ödənişlər 2013-cü ilin analoji dövrü ilə müqayisədə 12,47 faiz artaraq 6,11 milyon manat olub. Bu barədə Azərbaycan Maliyyə Nazirliyinin 2014-cü ilin yanvar-fevral aylarında sığorta şirkətlərini fəaliyyəti haqqında hesabatında deyilir.
İcbari Sığorta Bürosuna daxil olan və sığortanın bu növləri ilə məşğul olmaq hüququna malik olan 14 şirkət bu ilin yanvar-fevral aylarında nəqliyyat vasitəsi sahiblərinin mülki məsuliyyətinin icbari sığortası üzrə 7,58 milyon manat məbləğində yığım həyata keçiriblər ki, bu da 2013-cü ilin analoji dövrünün göstəricisindən təxminən 1 faiz azdır.
Ümumilikdə icbari sığorta yığımlarının 38,1 faizi (ötən ilin eyni dövründə 46,65 faiz) və bu ilin yanvar-fevral aylarında bazarda (ötən ilin eyni dövründə 9,7 faiz) toplanan bütün sığorta haqlarının 8,27 faizi sığortanın bu növünün payına düşür.
Bu ilin yanvar-fevral aylarında nəqliyyat vasitəsi sahiblərinin mülki məsuliyyətinin icbari sığortası üzrə 4,33 milyon manat həcmində ödəniş həyata keçirilib ki, bu da ötən ilin eyni dövründəki göstəricini 21,6 faiz üstələyir.
Şirkətlər daşınmaz əmlakın və daşınmaz əmlakın istismarı zamanı vətəndaş məsuliyyətinin icbari sığortası üzrə müvafiq olaraq 1,98 milyon manat (bu növ üzrə ödənişlər 243,83 min manat) və 70,35 min manat (ödənişsiz) vəsait toplayıblar.
2014-cü ilin yanvar-fevral aylarında Azərbaycanda həyat sığortası ilə məşğul olmaq hüququna malik olan üç şirkət - "Paşa Həyat", "Atəşgah Həyat" və "Qala Həyat" istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta üzrə 5,41 milyon manat vəsait toplayıblar. Bu, ötən ilin analoji dövrünün göstəricisini təxminən 23 faiz üstələyir.
2014-cü ilin yanvar-fevral aylarının yekunları üzrə Azərbaycanda fəaliyyət göstərən bütün şirkətlərin mükafatlarının ümumi həcmi 91,62 milyon manat (il ərzində artım 16,33 faiz), bu dövrdə ödənişlər isə 19,02 milyon manat (artım 17,29 faiz) olub.
Maliyyə Nazirliyinin hesabatında AzRE təkrar sığorta şirkətinin fəaliyyətinin yekunları göstərilməyib.