Azərbaycan, Bakı, 4 iyun /Trend, müxbir Z.Qurbanova/
Azərbaycanın sığorta şirkətləri 2014-cü ilin may ayında avtonəqliyyat vasitəsi sahiblərinin mülki məsuliyyətinin icbari sığortası üzrə 92 614 sığorta müqaviləsi bağlayıblar. Bu barədə Trend İcbari Sığorta Bürosuna istinadən məlumat verir.
Bunların 19 minə qədərini xarici ölkədə qeydiyyata alınmış və Azərbaycana tranzit məqsədilə daxil olan avtonəqliyyat vasitələri təşkil edib. Aprel ayı ilə müqayisədə onların sayı 11,76 faiz artıb.
Göstərilən dövrdə bağlanmış icbari sığorta müqavilələri üzrə daxil olan sığorta haqlarının məbləği 6,5 milyon manatdan çox olub.
Aprel ayı ilə müqayisədə bağlanmış müqavilələrin sayı 2,5 faiz, avtonəqliyyat vasitəsi sahiblərinin mülki məsuliyyətinin icbari sığortası üzrə yığımlar isə 3 faiz azalıb.
Cari ilin may ayında orta sığorta haqqı 70,2 manat təşkil edib ki, bu da ötən ilin müvafiq dövrü ilə müqayisədə 1,65 manat azdır.
Ötən ilin müvafiq dövrü ilə müqayisədə "avtonəqliyyat vasitəsi sahiblərinin mülki məsuliyyətinin icbari sığortası üzrə müqavilələrin sayında 3,73 faiz, sığorta haqlarının məbləğində isə 5,95 faiz azalma müşahidə olunub.
