Azərbaycan sığortaçılarının mayda istehsalatda sığorta üzrə yığımları 2 milyon dollardan çox olub
Azərbaycan, Bakı, 30 iyun /Trend, müxbir Zülfiyyə Qurbanova/
2014-cü ilin may ayında istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta üzrə 1458 sığorta müqaviləsi bağlanıb.
Trend-in İcbari Sığorta Bürosunun saytına istinadən verdiyi məlumata görə, bu müqavilələr üzrə daxil olan sığorta haqları 835,52 min manat təşkil edib.
Həmçinin müvafiq ayda əvvəlki dövrlərdə bağlanmış 687 müqaviləyə dəyişiklik edilib ki, bu müqavilələr üzrə daxil olan sığorta haqları 676,43 min manat olub.
Ümumilikdə may ayında istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta üzrə daxil olan sığorta haqları 1,5 milyon manatdan çox olub. İcbari sığortanın bu növü üzrə "Paşa Həyat Sığorta" ASC, "Qala Həyat" Sığorta Şirkəti ASC və "Atəşgah Həyat" Sığorta Şirkəti ASC fəaliyyət göstərirlər.
