Azərbaycan, Bakı, 16 sentyabr / Trend , müxbir D.Xatınoğlu /
Trend -un Fars redaksiyasının İranın Azərbaycandakı fövqəladə və səlahiyyətli səfiri Məhəmmədbağır Bəhrami ili müsahibəsi
- İran Xəzərdə qazma işləri aparmaq üçün iyulda suya buraxdığı "İran-Əlborz" qazma platforması ilə dənizin hansı hissəsində işlər aparır?
- Qazma işləri Xəzərin qonşu ölkələrlə mübahisəli ərazi olmayan hissəsində aparılır. İran və Azərbaycan prezidentləri arasında razılaşma əldə olunub ki, "Qadağan olunmuş ərazi" adlanan ərazidə, yəni Əlborz (Alov) regionunda heç bir qazma işləri aparılmasın. Ona görə ki, bu region mübahisəli regiondur. İndiyədək hər iki ölkə bu regionda qazma işləri aparmayıb və Xəzərin statusu təyin olunanadək də aparılmayacaq. Biz öz layihələrimizi mübahisəli olmayan regionlarda həyata keçiririk.
- "Sülh", "Pars" və "Neka-Cask" boru kəmərləri layihələrinin həyata keçirilməsi hansı mərhələdədir? Hindistanın "Sülh" boru kəmərində iştirak etməyəcəyi ilə bağlı şayiələr var.
- "Neka-Cask" boru kəmərinin tikintisi davam etdiriləcək və ola bilər ki, yatırılacaq sərmayə və tikinti işlərinin vaxtında bəzi dəyişikliklər olsun. İki il öncə İran Parlamentində nümayəndə olduğum dövrdə Əhmədinejadın Hindistanın Baş naziri Manmohan Singə mesajını çatdırdıq. O, bizi çox səmimiyyətlə qarşıladı. Biz bilirik ki, bu kimi işlər böyük işlərdir və böyük işlərin böyük düşmənləri də olur. Lakin bizim siyasətimiz budur ki, regionda sülh olsun və bütün region ölkələri sülh və əmin-amanlıq şəraitində yaşasınlar. Fikrimcə, regiondankənar ölkələr bunu istəmirlər. Dünya daha təkqütblü vəziyyətdə idarə olunmur. Regional təşkilatlar yaranıb, siyasi, iqtisadi və təhlükəsizlik sahələrində onlar birgə əməkdaşlıq edirlər.
- Bu gün İranın Milli Qaz Şirkətinin nümayəndə heyəti Bakıya səfər edib. İran Azərbaycanla qaz sahəsində necə əməkdaşlıq etmək niyyətindədir?
- Biz iki ölkənin enerji sahəsində gələcək əməkdaşlıq perspektivini yaxşı görürük. İranın İqtisadi İnkişaf Bankı bu sahəyə sərmayə yatırıb. Azərbaycanın "Şahdəniz" layihəsində əməkdaşlığımız var (İranın Milli Qaz Şirkətinin bu layihədə 10 faiz səhmi var). "Bakı-Astara" boru kəmərinin yenidənqurma işlərini həyata keçirməklə Azərbaycandan 5 milyard kubmetr qaz almaq məsələsini müzakirə edirik. Birgə komissiya bu sahədə müzakirələri fəallaşdırıb.
Məqalə müəllifi ilə əlaqə ünvanı: [email protected]
