Azərbayacn, Bakı, 19 iyul/ Trend , müxbirlər Ü.Sadıqova, D.Xatınoğlu/ Suriyanın Qərblə münasibətləri yaxşılaşdırmaq istəyi Suriya-İran münasibətlərinin kəskin pisləşməsinə səbəb olmayacaq. Suriya prezidenti Bəşər Əsəd iyulun 14-də Parisdə Aralıq dənizi sammitində Aİ-nın siyasət və iqtisadiyyat sahəsində əməkdaşlıq təklifini qəbul edib.
"Suriyanın Qərblə münasibətlərinin bərpa edilməsinin İranla münasibətlərin böhranına səbəb olacağını demək olmaz", - Trend -a Dəməşqdən elektron poçtu ilə Əl-Cəzirə-nin eksperti Əkrəm Xuzam deyib.
Suriya prezidentinin bəyanatına cavab olaraq, İranın Ali Dini Şurasının nümayəndəsi Hüseyn Şəriətmədari bildirib ki, Tehran Dəməşqlə bütün əlaqələri kəsəcək, - İran qəzeti "Keyhan" "Timeturk"ə istinadən xəbər verir.
Müstəqil iranlı politoloq Cəfər Mühəmmədinin sözlərinə görə, Şəriətmədarinin bəyanatına baxmayaraq, İran hələlik bu məsələyə dair öz mövqeyini bildirməyib. Onun fikrincə, İran başa düşür ki, Suriya bu addıma Qərbin təzyiqi ilə razılaşıb.
"İran Suriya və Qərbin münasibətlərin bərpası istiqamətində apardığı danışıqları ciddi qəbul etmir", - Trend -a şənbə günü Tehrandan telefonla Mühəmmədi bildirib. Politoloqun qeyd etdiyi kimi, Avropanın Dəməşqlə münasibətlərinin bərpasını çətin ki, müvəffəqiyyətli adlandırmaq mümkün olsun.
Ərəb ekspertləri də hesab edirlər ki, heç bir üçüncü tərəf İran və Suriyanın münasibətlərini pozmaq iqtidarında deyil. "Hətta İran tərəfi münasibətlərin dayandırılması haqqında bəyan etsə də, Dəməşqin bu məsələyə dair mövqeyi dəyişməz qalacaq", - şənbə günü Trend -a İstanbuldan telefonla ərəb eksperti Məhəlli deyib.
O deyib ki, İran və Suriyanı siyasi məsələlərdən çox, iqtisadi məsələlər bağlayır. "İki ölkənin qarşılıqlı əlaqəsi istər İranın, istərsə də Suriyanın strateji və iqtisadi maraqlarındadır", - Məhəlli əlavə edib.
Əl Cəzirə-nin eksperti Xusam da Suriya və İran münasibətlərinin eyni istiqamətdə davam edəcəyi fikri ilə razıdır. Çünki bu, iki ölkənin iqtisadiyyatina və ticarətinə xeyirdir. Ekspertin fikrincə, Suriya və Avropa münasibətləri hələ o qədər də yüksək səviyyədə deyil ki, Dəməşqin digər ölkələrlə münasibətlərinə təsir edə bilsin. Xusamın fikrincə, buna görə də Avropa və ya ABŞ Dəməşq və Tehranın münasibətlərində heç bir rol oynamayacaq.
İranın rəsmi informasiya agentliyi İRNA-nın məlumatlarına görə, 2007-ci ilin nəticələri üzrə Suriya və İran arasında mal dövriyyəsi 200 mln. dollar olub. Bunun 180 milyonu İslam Respublikasından olan ixracın payına düşür. Suriya iqtisadiyyatında İran sərmayələri 1 milyard dolları ötür. İranlılar Suriyada İranın "Prayd" və "Samand" markalı avtomaşınlarının yığımı üzrə zavod, sement istehsalı və taxıl saxlanması üçün müəssisələr tikirlər.
