Azərbaycan, Bakı, 25 noyabr /Trend, müxbir İ.İzzət/
Bakıda piyadanı vurub öldürməkdə şübhəli bilinən "KamAZ" markalı avtomobilin sürücüsü tutularaq istintaqa cəlb olunub.
Trend xəbər verir ki, bununla bağlı Bakı şəhər prokurorluğu və Baş Polis İdarəsi birgə məlumat yayıblar.
Məlumatda qeyd edilir ki, paytaxtın hüquq mühafizə orqanları tərəfindən yol hərəkəti və nəqliyyat vasitələrinin istismarı qaydalarını kobud şəkildə pozmaqla yol nəqliyyat hadisəsi törədərək hadisə yerindən qaçan sürücülərin müəyyən edilərək cinayət məsuliyyətinə cəlb olunmaları istiqamətində zəruri istintaq-əməliyyat tədbirləri davam etdirilir.
Noyabrın 23-də saat 21 radələrində paytaxtın Binəqədi rayonu ərazisində naməlum avtomobilin yol hərəkəti qaydalarını pozaraq yolu keçən piyada, 1956-cı il təvəllüdlü Məmmədov Qaramolla Xasay oğlunu vurub hadisə yerindən qaçması və sonuncunun aldığı xəsarətlərdən noyabrın 24-də xəstəxanada ölməsi faktına görə Rayon Polis İdarəsinin İstintaq şöbəsində Cinayət Məcəlləsinin 263.2 (yol hərəkəti və nəqliyyat vasitələrinin istismarı qaydalarını pozma) və 264-cü (yol nəqliyyat hadisəsi yerindən qaçma) maddələri ilə cinayət işi başlanıb.
Həyata keçirilmiş təxirəsalınmaz istintaq-əməliyyat tədbirləri nəticəsində qeyd olunan yol nəqliyyat hadisəsinin Məmmədov Allahverdi Valeh oğlunun idarə etdiyi "KamAZ" markalı avtomobillə törədilməsində əsaslı şübhələr olduğundan sonuncu tutularaq istintaqa cəlb olunub.
Hazırda iş üzrə istintaq davam etdirilir.