...

Azərbaycanın bir neçə müxalifət partiyasının Seçki Məcəlləsinə əlavə və dəyişikliklərlə bağlı təkliflərinə baxılmayıb

Siyasət Materials 6 Yanvar 2010 15:35 (UTC +04:00)
"Seçki Məcəlləsinə əlavə və dəyişikliklərlə bağlı layihəni payız sessiyası ərəfəsi Milli Məclisə təqdim etsək də, indiyədək müzakirəyə çıxarılmayıb", - bu barədə çərşənbə günü Trend News-a Azərbaycan Demokrat Partiyası sədrinin müavini Taliyət Əliyev bildirib.

Azərbaycan, Bakı, 06 yanvar / Trend , müxbir A.Hüseynbala/

Azərbaycanın bir neçə müxalifət partiyasının Seçki Məcəlləsinə əlavə və dəyişikliklərlə bağlı təkliflərinə baxılmayıb.

"Seçki Məcəlləsinə əlavə və dəyişikliklərlə bağlı layihəni payız sessiyası ərəfəsi Milli Məclisə təqdim etsək də, indiyədək müzakirəyə çıxarılmayıb", - bu barədə çərşənbə günü Trend -a Azərbaycan Demokrat Partiyası (ADP) sədrinin müavini Taliyət Əliyev bildirib.

Trend -un arayışı: Azərbaycanın altı müxalifət partiyasının təmsil olunduğu

"Qarabağ və Respublika Uğrunda Hərəkat" 2009-cu ilin ortalarında qanunvericilik təşəbbüsü ilə çıxış etmək məqsədilə işçi qrupu yaradıb.

İşçi qrupuna Seçki Məcəlləsi, "Siyasi partiyalar haqqında", "Sərbəst Toplaşmaq Azadlığı Haqqında" "Bələdiyyələrin Statusu Haqqında" qanunlara demokratik əlavə və dəyişikliklər edilməsilə bağlı təkliflər hazırlamaq tapşırılmışdı.

Sentyabr ayının axırlarında işçi qrupunun Seçki Məcəlləsinə əlavə və dəyişikliklərlə bağlı hazırladığı layihə Parlamentə təqdim olunmuşdu.

Əliyevin sözlərinə görə, əlavə və dəyişikliklər o zaman "Qarabağ və Respublika Uğrunda Hərəkatda" təmsil olunan altı partiyanın adından təqdim olunmuşdu: "Biz Seçki Məcəlləsinə 200-ə qədər əlavə və dəyişikliklərin edilməsini təklif edirdik. Bu layihənin hərəkatın üzvü olan bütün partiyaların rəhbərliyi səviyyəsində müzakirə olunması razılaşdırılmışdı. Amma Parlamentin Apartından layihə ilə bağlı heç bir rəy ala bilməmişik", - ADP funksioneri əlavə edib.

Sədr müavini deyib ki, layihə Milli Məclisin Aparatına Müsavat Partiyası deputat qrupu vasitəsilə təqdim olunub: "Lyihə təqdim olunarkən Parlamentin Dövlət quruculuğu və hüquq siyasəti komitəsində müzakirəyə çıxarılacağı bildirilirdi. Lakin ötən müddətdə təkliflərimiz nə müzakirəyə çıxarılıb, nə də əlavə və dəyişikliklərin taleyi haqda bizə rəsmi məlumat verilib", - Əliyev vurğulayıb.

Əliyev bu il parlament seçkiləri keçiriləcəyindən Seçki Məcəlləsinə əlavə və dəyişiklərin müzakirəyə çıxarılması üçün yenidən təşəbbüs göstərəcəklərini istisna etməyib.

"Qarabağ və Respublika Uğrunda Hərəkat"ı Azərbaycan Xalq Cəbhəsi, Vətəndaş və İnkişaf, Liberal, Demokrat, Müsavat və Ümid partiyaları 2009-cu il martın 18-də Konstitusiyaya təklif olunan əlavə və dəyişikliklərlə bağlı keçirilən referendum ərəfəsi təsis ediblər.

Hərəkatda təmsil olunan Müsavat Partiyası 2009-cu ildə keçirilən bələdiyyə seçkiləri ərəfəsində Ümid Partiyasının seçki komissiyalarındakı üzvlərinin geri çağırılmasını tələb edib. Ümid Partiyası isə Müsavat depuatat qrupunun üzvlərinin mandatlarında imtina edəcəyi təqdirdə tələbin yerinə yetirələcəyini bəyan edib. Hər iki partiya arasında yaranan bu gərginlik hərəkat daxilində ciddi böhrana səbəb olub və artıq fəaliyyətini dayandırıb.

Hakim Yeni Azərbaycan Partiyası hesab edir ki, Seçki Məcəlləsinə ciddi dəyişikliklərin edilməsinə ehtiyac yoxdur.

Məqalə müəllifi ilə əlaqə ünvanı: [email protected]

Xəbər lenti

Xəbər lenti